Aşgabat dokma toplumy (ADT) 4–6-njy iýun aralygynda paýtagtymyzda geçirilýän «Turkmentextile Expo-2026» halkara sergi-ýarmarkasynda öý dokma önümleriniň täzelenen toplumlaryny tanyşdyrdy. Kärhananyň häzirki zaman ugurlaryna laýyk gelýän mämişi we goýy ýaşyl-gök reňklerde bezelen sergi diwarlygy çäräniň iň özüne çekiji bölümleriniň birine öwrülip, ýerli hem-de daşary ýurtly myhmanlaryň uly gyzyklanmasyna eýe boldy.

Kompaniýanyň diwarlygy iki aýratyn konseptual bölümden ybarat edildi. Birinji bölüm mämişi öwüşginlerde bezelip, çöl fonunda şekillendirilen ahalteke bedewiniň uly pannosy, şeýle hem gündogar nagyşlary we iri gülli bezegler bilen bezelen düşek esbaplary bilen tapawutlandy. Ikinji bölüm bolsa çagalar üçin niýetlenip, ýaşyl-gök reňklerde, umman tolkunlarynyň şekilleri bilen bezeldi. Bu ýerde meşhur multfilmleriň gahrymanlary şekillendirilen reňkli düşek toplumlary, baş ýapynjaly çagalar halatlary hem-de ýumşak oýnawaç-ýassyklar görkezildi.

Kärhananyň baş direktorynyň orunbasary Jennet Hojanazarowanyň sözlerine görä, şu ýylky diwarlygyň konsepsiýasy dokma toplumynyň dizaýnerleriniň we çeperçilik geňeşiniň bilelikdäki zähmetiniň netijesi boldy. «Bu ýerde diňe bir gündogar nagyşlary däl-de, eýsem gülli bezegler hem bar. Mysal üçin, uly bägül şekili ýerleşdirildi. Käbir zenanlar açyk reňkleri we iri gülleri halaýarlar» — diýip, ol belledi.

Kärhana matalaryň ýüzüne nagyşlary geçirmek üçin çap etmegiň birnäçe tehnologiýasyny, şol sanda basma we galyplama usullaryny ulanýar. Enjamlar Germaniýadan, Türkiýeden we Italiýadan getirilýär. Çagalar üçin niýetlenen toplumlar galyplama çap usuly arkaly öndürildi. «Basma nagyşy her 8–10 santimetrden gaýtalanýar. Galyplama usuly bolsa başgaça işleýär, ol pannony ýada salýar» — diýip, Hojanazarowa düşündirdi.

ADT-niň diwarlygy sergä gatnaşýan daşary ýurtly wekilleriň hem uly gyzyklanmasyny döretdi. Serginiň netijeleri boýunça kompaniýa geljek hepde birnäçe iş duşuşyklaryny geçirmegi meýilleşdirdi.

Aşgabat dokma toplumynyň önümleri Russiýa we goňşy ýurtlara, esasan hem tüýjümek önümleri, el süpürgiçler we halatlar görnüşinde eksport edilýär. Şeýle-de kärhananyň düşek esbaplary Ýewropa ýurtlarynda, hususan-da, Italiýada we Ispaniýada uly islege eýedir.

«Turkmentextile Expo-2026» halkara sergi-ýarmarkasy 100-den gowrak kompaniýany bir ýere jemledi. Çäräniň tematikasy dokma senagaty üçin enjamlary, tebigy süýümleri gaýtadan işlemegi, moda we dizaýny, zergärçilik önümlerini hem-de ýeňil senagatyň beýleki ugurlaryny öz içine alýar.