1-nji iýunda Türkmenistanyň Gyrgyz Respublikasyndaky ilçisi Nury Gölliýew Gyrgyz Respublikasynyň Žogorku Keneşiniň Başlygy Marat Mamataliýew bilen duşuşdy.

Duşuşygyň dowamynda taraplar türkmen-gyrgyz gatnaşyklarynyň häzirki ýagdaýyny we geljekki ösüşiniň mümkinçiliklerini ara alyp maslahatlaşdylar. Bu barada Türkmenistanyň Bişkekdäki diplomatik wekilhanasy habar berdi.

Taraplar Türkmenistanyň hem-de Gyrgyz Respublikasynyň arasyndaky hyzmatdaşlygyň parlamentara gatnaşyklary, söwda-ykdysady we medeni-ynsanperwer ugurlar ýaly köp sanly ugurlar boýunça yzygiderli ösdürilýändigini bellediler.

Söhbetdeşler ikitaraplaýyn gatnaşyklaryň mundan beýläk-de pugtalandyrylmagynda möhüm orun eýeleýän parlamentara dialogyň ösdürilmegi bilen bagly meselelere aýratyn üns berdiler. Şunuň bilen baglylykda, iki döwletiň kanun çykaryjy edaralarynyň arasyndaky netijeli hyzmatdaşlygy giňeltmäge ýardam berýän dostluk toparlarynyň işini işjeňleşdirmegiň ähmiýeti nygtaldy.

Ilçi N.Gölliýew Türkmenistanyň Gyrgyz Respublikasy bilen özara bähbitli hyzmatdaşlygy ileri tutulýan ugurlar boýunça mundan beýläk-de ösdürmäge ygrarlydygyny tassyklady.

Duşuşygyň dowamynda özara saparlary guramak, dürli derejelerde gatnaşyklary dowam etdirmek, şeýle hem iki ýurduň wekilleriniň halkara we parlamentara çärelerine gatnaşmagy bilen bagly meseleler hem ara alnyp maslahatlaşyldy diýlip, habarda bellenilýär.