Belet striming platformasy daşary ýurt kontentiniň ýygyndysyny köpden bäri garaşylýan täze film bilen baýlaşdyrdy. Indi tomaşaçylar «Jandarpolis 2» atly animasiýa filmini türkmen dilinde tomaşa edip bilerler.

Meşhur wakanyň dowamynda tomaşaçylar ýene-de haýwanlaryň ýaşaýan döwrebap şäherine dolanýarlar. Bu gezek polisiýa işgäri Judi Hopps we onuň kärdeşi Nik Waýld täze derňewler, garaşylmadyk wakalar hem-de gyzykly keşpler bilen ýüzbe-ýüz bolýarlar. Multfilmiň birinji bölümi täsirli sýužeti, özüne çekiji degişmeleri we möhüm jemgyýetçilik meselelerini gozgaýandygy sebäpli dünýäniň millionlarça tomaşaçysynyň söýgüsini gazanypdy.

«Jandarpolis 2» multfilminiň türkmen dilinde elýeterli edilmegi Belet platformasynyň döwlet dilindäki kontenti giňeltmek ugrunda alyp barýan işleriniň nobatdaky ädimi boldy. Platforma dünýä belli filmleri we multfilmleri türkmen diline terjime etmek boýunça yzygiderli işleýär hem-de meşhur halkara premýeralaryny türkmen dilli tomaşaçylar üçin has elýeterli edýär.

Bu işiň netijesinde tomaşaçylar halaýan filmlerine we animasion taslamalaryna ene dilinde tomaşa etmäge mümkinçilik alýarlar. Çagalar bolsa dünýä kinematografiýasynyň meşhur gahrymanlary bilen ýokary hilli türkmençe terjimäniň üsti bilen tanyşýarlar.

Täze film eýýäm Belet platformasynda tomaşa etmek üçin elýeterlidir. Platforma türkmençe seslendirilýän we terjime edilýän dünýä hitleriniň ýygyndysyny yzygiderli baýlaşdyrmagyny dowam etdirýär.