13-nji maýda Türkmenistanyň daşary işler ministriniň orunbasary Mähri Bäşimowa bilen Birleşen Arap Emirlikleriniň Türkmenistandaky Adatdan daşary we Doly ygtyýarly ilçisi Ahmed Al-Haý Hamad Hamis Al-Hameliniň arasynda duşuşyk geçirildi.

Duşuşygyň dowamynda taraplar Türkmenistan bilen BAE-niň arasyndaky hyzmatdaşlygyň häzirki ýagdaýy we geljekki mümkinçilikleri barada pikir alyşdylar. Şeýle-de ikitaraplaýyn gatnaşyklar bilen birlikde halkara guramalaryň we köptaraplaýyn meýdançalaryň çäklerindäki hyzmatdaşlyk meseleleri ara alnyp maslahatlaşyldy. Bu barada Türkmenistanyň DIM-iniň saýtynda habar berilýär. 

Söhbetdeşler bilim we ekologiýa howpsuzlygy ugurlarynda özara hyzmatdaşlygy pugtalandyrmagyň meseleleri boýunça pikir alyşdylar hem-de daşky gurşawy goramaga hem-de durnukly ösüşe gönükdirilen bilelikdäki başlangyçlary durmuşa geçirmekde hyzmatdaşlygy giňeltmegiň möhümdigini nygtadylar.

Gepleşikleriň dowamynda taraplar şu ýyl üçin meýilleşdirilen bilelikdäki çäreleri hem ara alyp maslahatlaşdylar diýlip, habarda bellenilýär.