Belet onlaýn kinoteatry 5–7-nji maý aralygynda geçiriljek Çempionlar ligasynyň, Ýewropa ligasynyň we Konferensiýa ligasynyň ähli jogap ýarym final oýunlaryny göni ýaýlymda görkezjekdigini habar berdi. Ähli duşuşyklar «Premium» abunasy arkaly elýeterli bolar.

Çempionlar ligasy:

Sişenbe güni, 5-nji maýda, Aşgabat wagty bilen gije sagat 00:00-da Londonda «Arsenal» bilen Madridiň «Atletiko» klubynyň arasynda jogap ýarym final oýny geçiriler. Ilkinji duşuşyk 1:1 hasaby bilen deňme-deň tamamlandy.

Çarşenbe gününden penşenbe gününe geçilýän gije, 7-nji maýda, sagat 00:00-da Aşgabat wagty bilen Münhende «Bawariýa» bilen Fransiýanyň «PSŽ» toparlarynyň arasynda jogap oýun bolar. Birinji oýnuň netijesine görä, Parižiň topary 5:4 hasap bilen öňde barýar.

Penşenbe gününden anna gününe geçilýän gije, 8-nji maýda, Aşgabat wagty bilen gije sagat 00:00-da birbada iki ýaryşda dört jogap ýarym final oýunlary başlanar.

Ýewropa ligasynyň ýarym finallary:

• «Aston Willa» – «Nottingem Forest» (birinji oýun – 0:1)

• «Fraýburg» – «Braga» (birinji oýun – 1:2)

Konferensiýa ligasynyň ýarym finallary:

• «Kristal Pelas» – «Şahtýor» (birinji oýun – 3:1)

• «Strasbur» – «Raýo Walýekano» (birinji oýun – 0:1)

Ýewrokuboklaryň final duşuşyklary maý aýynyň ahyryna çenli meýilleşdirildi. 20-nji maýda Stambulda Ýewropa ligasynyň finaly geçiriler, 27-nji maýda Leýpsigde Konferensiýa ligasynyň finaly bolar, 30-njy maýda bolsa Budapeştde Ýewropanyň klub futbolyndaky iň esasy baýragyň — Çempionlar ligasynyň ýeňijisi belli bolar.