1-nji noýabrda Sankt-Peterburgda «Russiýa ― meniň taryhym» seýilgähinde «Ruhubelent Türkmenistan» atly türkmen medeniýetiniň günleriniň açylyş dabarasy bolar. Şäheriň «Zenit» toparynyň futbolçysy, eýranly türkmen Serdar Azmunyň bu dabara hormatly myhmanlaryň hatarynda gatnaşmagyna garaşylýar.

Dabaralaryň myhmanlary onuň çäginde «Türkmenistan ― ruhubelentligiň sährasy» atly surat sergisini synlap bilerler. Hormatly Prezidentimiz Gurbanguly Berdimuhamedowyň «Türkmen alabaýy» atly täze kitabynyň tanyşdyrylyş dabarasy bolsa bu çäreleriň iň täsirli pursatlarynyň biri bolar.

Agşamlyk myhmanlara dabaraly konsert, türkmen milli lybaslarynyň, şaý-sepleriniň sergisi garaşýar. Dabaralara Türkmenistanyň Russiýa Federasiýasyndaky ilçihanasyndan, Sankt-Peterburgyň dolandyryşyndan we ýerli medeniýet-sungat işgärlerinden wekiller gatnaşar.