Gümrük statistikasynyň 2024-nji ýyl boýunça seljermesi bu döwürde Türkmenistandan eksport edilen harytlaryň köpelendigini görkezýär. Bu harytlaryň aglaba bölegini oba hojalyk önümleri düzýär diýip, Türkmenistanyň Döwlet gümrük gullugy habar berýär.
Hususan-da, ýyladyşhanalardan alnan pomidor hasylynyň daşary döwletlere eksport edilen möçberiniň has artandygy bellenilýär. Daşary ýurtlara çykarylan pomidoryň umumy mukdary 149 müň tonna boldy. Bu görkeziji 2022-nji ýyla görä 43 göterime golaý ýokarlandy. 2024-nji ýylda umumy eksport edilen pomidoryň 56%-e golaýy Russiýa Federasiýasyna, 28%-e golaýy Gazagystana we 11%-den gowragy Gyrgyzystana iberildi.
2024-nji ýylda Türkmenistanyň eksportynyň haryt gurluşynda gök-bakja ekinleri we miwe önümleri hem agdyklyk edýär. Geçen ýylyň başyndan bäri mäşiň 13 müň tonna golaýy, ter düýp soganyň 6 müň tonna golaýy, ter miweleriň we üzümiň 4 müň tonna golaýy eksport edildi. Bulardan başga, görkezilen döwürde goňşy ýurtlara konditer önümleriniň, gaplanan gök-bakja we miwe önümleriniň, alkogolsyz içgileriň uly möçberleri eksport edildi.
Eksporta ýardam berýän şertleri döretmek babatda gümrük amallarynyň awtomatlaşdyrylmagy we sanlylaşdyrylmagy Döwlet gümrük gullugynyň ileri tutulýan ugry bolup durýar. 2024-nji ýylyň 1-nji ýanwaryndan bäri Eksport-import amallary üçin bir penjire mehanizminiň işe girizilendigini hem-de ýurdumyzyň eksport edijileriniň ulgama girip we portal arkaly hyzmatlary elektron görnüşde alyp bilýäniklerini ýatlatmak isleýäris. Munuň özi harytlary gümrük taýdan resmileşdirmek işini birnäçe esse çaltlaşdyrýar.
