Türkiýäniň milli howa gatnadyjysy dünýäniň iň köp ýurtlaryna uçýan awiakompaniýa hökmünde resmi taýdan Ginnesiň rekordlar kitabyndan orun aldy. Degişli güwänamanyň gowşurylyş dabarasy awiakompaniýanyň Çilä amala aşyran ilkinji uçuşyndan soň, Santiago Arturo Merino Benites halkara howa menzilinde geçirildi.
Ginnesiň rekordlar kitabynyň şertlerine laýyklykda, «Turkish Airlines» soňky 12 aýyň dowamynda rekord derejedäki 120 ugra howa gatnawyny amala aşyrdy. Wagtlaýyn togtadylan gatnawlar we Çili döwletine bolan täze uçuş hasaba alnanda, awiakompaniýanyň umumy gatnaw ulgamy 131 ýurdy öz içine alýar.
«Turkish Airlines» awiakompaniýasynyň 2012-nji ýyldan bäri uçuşlarynyň geografiki gerimi boýunça dünýäde öňdeligi eýeländigini, häzirki wagtda bolsa bu netijäniň Ginnesiň Rekordlar kitabyna girizilip, resmi taýdan ykrar edilendigini bellemelidiris.
