Ozal habar berşimiz ýaly, häzirki wagtda Halkara ynsanperwer ylymlary we ösüş uniwersitetiniň wekiliýeti Rumyniýada saparda bolýar. Saparyň çäginde Rumyniýanyň Alba-Ýuliýa şäherinde ýerleşýän «1 Decembrie 1918» uniwersitetinde duşuşyk geçirildi. Duşuşygyň dowamynda «1 Decembrie 1918» uniwersitetiniň rektory Daniýel Breaz hem-de Halkara ynsanperwer ylymlary we ösüş uniwersitetiniň prorektory Nurmuhammet Şyhlyýew Türkmenistanda rumyn uniwersitetiniň şahamçasyny açmak meselesi boýunça pikir alyşdylar. Bu barada «Orient» habar berýär.

Çeşmäniň bellemegine görä, taraplar «1 Decembrie 1918» uniwersitetiniň Aşgabatdaky şahamçasyny Halkara ynsanperwer ylymlary we ösüş uniwersitetiniň binýadynda açmak barada özara düşünişmek hakyndaky Ähtnamany taýýarlamak meselesini ara alyp maslahatlaşdylar. Hususan-da, şahamçada, ilkinji nobatda, magistr maksatnamasy boýunça Biznes administrasiýasy ugrundan bilim bermek göz öňünde tutulýar.

Şeýle-de saparyň çäginde iki ýokary okuw mekdebiň arasynda Ýewropa Bileleşiginiň «Erasmus+» maksatnamasynyň çäginde hyzmatdaşlyk etmek meselesine bagyşlanylan «tegelek stol» hem geçirildi.

Ýeri gelende bellesek, Rumyniýanyň «1 Decembrie 1918» uniwersiteti Halkara ynsanperwer ylymlary we ösüş uniwersiteti bilen 2018-nji ýyldan bäri hyzmatdaşlyk edip gelýär. Geçen wagtyň dowamynda halkara hukugy we kompýuter tehnologiýalary ugurlary boýunça mugallymlaryň alyş-çalyşy, «Erasmus Mobility Program (Erasmus +)» maksatnamasynyň çäklerinde talyplaryň alyş-çalyşy hem-de bilelikdäki ylmy gözlergler durmuşa geçirildi.