Girmek
BBC habarlar gullugy 2024-nji ýyl üçin «Dünýäniň 100 zenany» atly sanawyny çap etdi. Oňa bütin dünýäniň iň ruhlandyryjy we täsirli zenanlary girdi. Şu ýylyň zenan gahrymanlarynyň arasynda Parahatçylyk boýunça Nobel baýragynyň eýesi Nadýa Murad, Golliwudyň aktrisasy Şeron Stoun we özbegistanly telekeçi zenan Dilorom Ýuldaşewa bar diýip, «Daryo.uz» ýazýar.
Dilorom Ýuldaşewanyň taryhy— bu haýran galdyryjy ruhy güýjüň we gaýduwsyzlygyň nusgasydyr. Ol iki ýyl mundan öň pagta hasyly ýygnalýarka, betbagtçylykly waka netijesinde iki aýagyny aldyrdy. Emma Dilorom ruhdan düşmän, täze şertlere uýgunlaşdy, hatda beýlekilere hem kömek edip başlady.
Ol täze hünär ukyplaryny edinmek we Özbegistanda beýleki zenanlara kömek etmek maksady bilen, tikinçilik telekeçiligini öwrendi. Telekeçiligiň we dolandyrmagyň esaslaryny ele alan Dilorom 40-dan gowrak zenana gazanç etmek üçin mümkinçilik döretdi. Birnäçe aýyň dowamynda onuň kärhanasy mekdep egin-eşiklerini we işçiler üçin ýörite geýimleri tikmek barada geleşikleri baglaşyp, üstünlik gazandy.
«Men öz-özüme we beýlekilere betbagtçylygyň ömrüň ahyry däldigini subut etmek isledim. Bu täze ýoluň başlangyjy» diýip, Dilorom gürrüň berýär.