Türkmenistanyň Döwlet energetika institutynda Türkmenistanyň Hökümeti bilen Ýewropada Bileleşiginiň Aşgabatdaky Merkeziniň 2024-nji ýyl boýunça ylalaşylan meýilnamalaryň çäklerinde «Daşky gurşawy goramak üçin durnukly energiýa. Öňdebaryjy halkara tejribesini seljermek» atly halkara maslahaty geçirildi.

Türkmenistanyň Bilim ministrliginiň resmi saýtynda habar berilmegine görä, halkara maslahat mynasybetli institutyň Baş binasynyň öňündäki meýdançada «Kuwwat» aýdym-saz toparynyň ýerine ýetirmeklerinde birnäçe çykyşlara tomaşa edildi. Soňra bolsa halkara maslahata gatnaşyjylar institutyň Baş binasynyň eýwanynda ýaýbaňlandyrylan ylmy işleriň sergisi bilen tanyşdylar.

Halkara maslahata Polşadan, Gruziýadan, Latwiýa Respublikasyndan, Gazagystan Respublikasyndan halkara bilermenler gatnaşdylar. Halkara maslahatyň dowamynda häzirki wagtda gurulýan we gurulmagy meýilleşdirilýän binalara «ýaşyl» güwänamanyň berilmeginiň şertleri hem-de mümkinçilikleri, täze gurulýan binalarda energiýa netijeliligi ýokary bolan tehnologiýalary ornaşdyrmagyň aýratynlyklary ýaly ylmy temalar boýunça birnäçe çykyşlar diňlenildi. Çykyşlaryň dowamynda diňleýjiler tarapyndan uly gyzyklanma bildirilip, özara pikir we sorag-jogap alyşyldy.

Günüň ikinji ýarymynda halkara bilermenler tarapyndan Türkmenistanyň Döwlet energetika institutynyň professor-mugallymlarynyň, ylmy işgärleriniň hünär derejesini ýokarlandyrmak maksady bilen «Merkezi Aziýada durnukly energiýa arabaglanyşygy» atly okuw seminary geçirildi. Soňra bolsa gatnaşyjylara degişli şahadatnamalar gowşuryldy.