17-nji dekabrda Aşgabat şäherinde Ykdysady hyzmatdaşlyk boýunça hökümetara Türkmen-ýapon we Ýapon-türkmen komitetleriniň bilelikdäki 15-nji mejlisi geçiriler.

Halkara habarlar merkeziniň ýazmagyna görä, çärä gatnaşmak üçin Ýaponiýanyň iň öňdebaryjy korporasiýalarynyň ýokary derejeli ýolbaşçylaryny öz içine alýan 100-e golaý adamdan ybarat ýapon wekiliýeti türkmen paýtagtyna geler.

Çäräni Ýaponiýanyň Russiýa we GDA ýurtlary bilen söwda-ykdysady gatnaşyklary boýunça Assosiasiýasy (ROTOBO) guraýar. Mejlisiň gün tertibinden ulag infrastrukturasy, elektroenergetika, senagat, suw hojalygy, maliýe, ekologiýa, bilim we saglygy goraýyş ugurlary bilen bagly meseleler giriziler. Şeýle-de taraplar hyzmatdaşlygy pugtalandyrmaga, maýa goýumlary çekmäge we innowasiýalary ornaşdyrmaga gönükdirilen taslamalary ara alyp maslahatlaşarlar.