19-21-nji noýabr aralygynda Taýlandyň Bangkok şäherinde «Pekin+30» formatyndaky Aziýa-Ýuwaş ummany sebitiniň ministrler maslahaty geçirildi. BMG-niň Aziýa-Ýuwaş ummany üçin Ykdysady we durmuş geňeşiniň howandarlygynda guralan foruma Türkmenistanyň wekiliýeti hem gatnaşdy. Forum 2025-nji ýylda bellenilip geçiljek Zenanlaryň ýagdaýy boýunça 4-nji ählumumy jarnamanyň 30 ýyllygyna taýýarlygyň çäklerinde bolup geçdi.
Çäre dünýäniň dürli ýurtlaryndan döwlet edaralarynyň, raýat jemgyýetçilik guramalarynyň, ýaşlar toparlaryny, ylmy institutlaryň we hususy düzümiň wekilleriniň 1200-den gowragy gatnaşdy. Şolaryň hatarynda Türkmenistanyň Zenanlar birleşiginiň Merkezi geňeşiniň başlygy O.Berdiliýewa, Türkmenistanyň Döwlet, hukuk we demokratiýa institutynyň demokratiýa we halkara gatnaşyklar bölüminiň başlygy Ş.Atajanowa, Türkmenistanyň Zenanlar birleşiginiň Merkezi geňeşiniň baş hünärmeni Ş.Setdarowa hem-de Türkmenistanyň Malaýziýadaky ilçihanasynyň ikinji sekretary Y.Sähedow dagy Türkmenistana wekilçilik etdiler.
Forumyň dowamynda 140 agza döwletiň we sebit toparlarynyň Pekin jarnamasyny we Hereketler platformasyny durmuşa geçirmekdäki öňegidişlikler we ýüze çykýan bökdençlikler baradaky synlaryna garaldy. Şol sanda Türkmenistanyň hem gender deňligi boýunça toplan tejribesi we geljek üçin meýilnamalary paýlaşyldy.
Zenanlar birleşiginiň Merkezi geňeşiniň başlygy O.Berdiliýewa öz çykyşynda Türkmenistanyň gender deňligini üpjün etmekde we durmuşyň ähli ugurlarynda zenanlaryň ornuny ýokarlandyrmakda möhüm işleri durmuşa geçirýändigini nygtady. Şunuň bilen baglylykda, zenanlaryň döwleti dolandyryş edaralarynda wekilçilik etmeginiň ýokary derejesi belläp geçilip, Türkmenistan Mejlisiniň 125 deputatynyň 32-siniň (26%) zenandygyna üns çekildi.
Mundan başga-da, ol gender deňligini üpjün etmek üçin strategiki maksatlary kesgitleýän «Türkmenistanda gender deňligi boýunça 2021-2025-nji ýyllar üçin hereketleriň milli meýilnamasy» barada durup geçdi. Türkmenistanyň bu ugurdaky üstünlikleriniň halkara derejesinde ykrar edilendigi: ýurduň 2022–2024-nji ýyllar üçin BMG-niň Gender deňligi we zenanlaryň ygtyýarlyklary baradaky guramasynyň Ýerine ýetiriji geňeşine saýlanandygy nygtaldy.
