Türkmenistanyň Prezidenti we Halk Maslahatynyň başlygy Trampy ABŞ-nyň Prezident saýlawlarynda ýeňiş gazanmagy bilen gutladylar, Türkmenistanyň we Eýranyň daşary işler ministrleriniň arasynda telefon arkaly söhbetdeşlik boldy, «SpaceX» «Turkmentel – 2024» halkara maslahatyna gatnaşar we beýleki habarlar
Türkmenistanda
1. Prezident Serdar Berdimuhamedow Donald Trampy ABŞ-nyň Prezidenti wezipesine saýlanmagy bilen gutlady. Türkmen döwletiniň Baştutany iberen gutlag hatynda Türkmenistanyň Amerikanyň Birleşen Ştatlary bilen gatnaşyklarynyň häzirki derejesine ýokary baha berýändigini hem-de ikitaraplaýyn hyzmatdaşlygyň mundan beýläk-de ösdürilmegine uly ähmiýet berýändigini aýtdy. Türkmenistanyň Halk Maslahatynyň Başlygy Gurbanguly Berdimuhamedow hem Donald Trampa gutlaglaryny iberip, Türkmenistanyň ABŞ bilen dostlukly gatnaşyklara ýokary baha berýändigini belledi.
2. Türkmenistanyň we Eýranyň daşary işler ministrleri Raşid Meredow bilen Seýed Abbas Aragçi telefon arkaly söhbetdeşligiň dowamynda Ykdysady hyzmatdaşlyk boýunça türkmen-eýran hökümetara toparynyň şu mejlisini ýylyň ahyryna çenli geçirmek hakynda ylalaşdylar. Bu iki ýurduň arasyndaky söwda-ykdysady gatnaşyklary pugtalandyrmaga gönükdirilen toparyň 18-nji mejlisi bolar. Söhb etdeşligiň dowamynda medeni-ynsanperwer gatnaşyklary ösdürmäge aýratyn üns berildi. Taraplar noýabr-dekabr aýlarynda bilelikdäki çäreleri, şol sanda «Iran Agro Food» sergisini, Çagalaryň dostlugy hepdeligini, zergärçilik boýunça ussatlyk sapaklaryny geçirmek barada ylalaşdylar.
3. «SpaceX» kompaniýasy Türkmenistanyň paýtagtynda geçiriljek «Türkmentel – 2024» atly halkara ylmy maslahata gatnaşjakdygyny tassyklady. Kompaniýanyň satuw bölüminiň direktory Ýelena Pyşer bu möhüm çärede amerikan kosmos kompaniýasyna wekilçilik eder. Maslahat üç günüň dowamynda, 14 – 16-njy noýabr aralagynda Türkmenistanyň Söwda-senagat edarasynyň binasynda geçiriler.
4. Türkmenistanyň Prezidenti Serdar Berdimuhamedow «Türkmenistanda korrupsiýa garşy hereket etmek boýunça 2025 — 2029-njy ýyllar üçin Milli maksatnamanyň» taslamasyny taýýarlamagy tabşyrdy. Tabşyryk Döwlet howpsuzlyk geňeşiniň nobatdaky mejlisiniň dowamynda berildi. Onda harby we hukuk goraýjy edaralar tarapyndan şu ýylyň on aýynda ýerine ýetirilen işleriň jemleri jemlenildi. Şeýle-de mejlisde ýurtda howpsuzlygy üpjün etmek maksady bilen, harby we hukuk goraýjy edaralaryň maddy-enjamlaýyn binýadyny pugtalandyrmak we olaryň işini mundan beýläk-de kämilleşdirmek bilen bagly meselelere garaldy. Mundan başga-da, döwlet Baştutany «Türkmenistanyň kazyýetleriniň kazylaryny wezipä bellemek we wezipeden boşatmak hem-de olara hünär derejelerini bermek hakynda» Permana gol çekdi.
5. Türkmenistanyň daşary işler ministri Raşid Meredow bilen Ýewropanyň Täzeleniş we ösüş bankynyň Türkmenistandaky wekilhanasynyň ýolbaşçysy Erik Liwniniň arasynda duşuşyk geçirildi. Onda Türkmenistan bilen Ýewropanyň Täzeleniş we ösüş bankynyň arasyndaky hyzmatdaşlygy berkitmek meseleleri boýunça pikir alşyldy.
Dünýäde
6. NASA tarapyndan uçurylan «Ýunona» kosmos enjamy Ýupiteriň täsin suratlaryny Ýere iberdi, olar planetany synlamagyň tutuş taryhynda rekord derejede jikme-jiklik bilen tapawutlanýar. Bu täsir galdyryjy suratlar zondyň gaz ägirdiniň golaýyndan 66-njy uçuşynda düşürildi. Bu missiýanyň dowamynda «Ýunona» Ýupiteriň hemralarynyň biri bolan Amalteýany hem surata düşürmegi başardy. Bu ýakynlaşma planetanyň uly bolmadyk hemrasy barada täze maglumatlary almaga mümkinçilik berdi.
7. Norwegiýada geçirilen «FIFe World Show» halkara sergisinde dünýädäki iň owadan pişikleriň arasyndan ýeňiji saýlandy. Bu ada 1500-den gowrak bäsdeşinden öňe saýlanan Bakardi atly rus mawy pişigi mynasyp boldy.
Sport täzelikleri
8. FIFA-nyň prezidenti Janni Infantino Guwançmuhammet Öwekowy Türkmenistanyň Futbol federasiýasynyň başlygy wezipesine saýlanmagy bilen gutlady. 4-nji noýabrda Türkmenistanda TFF-niň başlygynyň saýlawlary geçirildi, onuň netijeleri boýunça Öwekow bu wezipä biragyzdan saýlandy.
