Türkmenistanda «CIET – 2024» atly halkara maslahat öz işini tamamlady, Türkmenistanyň ilçisi Bişkekde geçirilen TDG-niň sammitine gatnaşýar, türkmen kompaniýalary Hytaýda geçiriljek üpjünçilik zynjyrlarynyň iň iri sergisine çagyrylýar we beýleki habarlar
Türkmenistanda
1. Aşgabatda «Türkmenistanyň gurluşygy, senagaty, energetikasy» atly halkara sergi we halkara maslahat öz işini tamamlady. Forumyň jemleýji gününde tehnologik innowasiýalara we Türkmenistanyň ykdysadyýetiniň pudaklary üçin ýokary bilimli hünärmenleri taýýarlamaga bagyşlanan 5-nji mowzuklaýyn mejlis geçirildi. Halkara sergä we maslahata gatnaşyjylary sylaglamak dabarasy forumyň esasy wakalarynyň biri boldy. Çäräniň ahyrynda «CIET – 2024» forumyna gatnaşyjylaryň Türkmenistanyň Prezidenti Serdar Berdimuhamedowyň adyna kabul eden Ýüzlenmesi okaldy.
2. Türkmen kompaniýalary 2024-nji ýylyň noýabr aýynyň ahyrynda Pekinde geçiriljek «China International Supply Chain Expo» atly ikinji halkara sergisine gatnaşmak üçin çakylyk aldylar. Üpjünçilik zynjyrlary boýunça ýöriteleşen dünýäde ilkinji milli sergi bolan bu çäre 26 – 30-njy noýabr aralygynda Hytaýyň paýtagtyndaky Halkara sergi merkezinde geçiriler. Serginiň dowamynda umumy meýdany 100 000 inedördül metrden gowrak bolan pawilýonlarda üpjünçilik zynjyrynyň 50-ä golaý ugurlary we esasy bölekleri görkeziler. Serginiň dowamynda esasy üns «Bir guşak – bir ýol» başlangyjynyň çäklerindäki hyzmatlara gönükdiriler. Sergi «akylly» ulag, öňdebaryjy önümçilik, «ýaşyl» oba hojalygy, arassa energetika hem-de sanly tehnologiýalar ýaly möhüm ugurlary öz içine alýar.
3. Çarşenbe güni Bişkekde Türki Döwletleriň Guramasynyň (TDG) sammiti öz işine başlady. Onuň işine Azerbaýjanyň, Gazagystanyň, Gyrgyzystanyň, Türkiýäniň, Özbegistanyň döwlet Baştutanlary, Wengriýanyň we Türkmenistanyň wekilleri gatnaşýarlar. Türkmen tarapyna Adatdan daşary we Doly ygtyýarly ilçi Nury Gölliýew wekilçilik edýär. Sammitiň netijeleri boýunça kabul ediljek esasy resminama Guramanyň hukuk derejesini kesgitleýän Bişkek jarnamasy bolar. Mundan başga-da, taraplar «ýaşyl ykdysadyýet» pudagynda hyzmatdaşlyk etmegiň meselelerini ara alyp maslahatlaşarlar.
4. Türkmenistanyň we daşary ýurtlaryň ýokary okuw mekdepleriniň talyplary 20-nji noýabrda Myrat Garryýew adyndaky Türkmenistanyň Döwlet lukmançylyk uniwersitetinde geçiriljek Biologiýa boýunça III halkara internet olimpiadasyna gatnaşmaga çagyrylýar. Gatnaşanlary hasaba almak 10-njy noýabra çenli dowam eder. Olimpiadada çykyş etmek isleýän talyplar lukmançylyk uniwersitetiniň saýtynda gatnaşmak üçin ýüztutmany doldurmalydyrlar. Hasaba alnan talyplara olimpiadadan bir gün öň olaryň görkezen elektron salgysyna gatnaşmak üçin login we parol ugradylar.
5. Türkmenistanyň wekiliýeti Kuweýtde geçirilen ýokary derejeli maslahatyň ministrler mejlisine gatnaşdy. Bu çäre Duşenbe prosesiniň çäklerinde terrorçylyga garşy göreşmek ulgamynda halkara hyzmatdaşlygynyň we serhet howpsuzlygynyň mehanizmlerini kämilleşdirmegiň meselelerine bagyşlandy. Türkmenistanyň daşary işler ministriniň orunbasary Ahmet Gurbanow öz çykyşynda ýurduň milli we halkara derejesinde parahatçylyga hem-de howpsuzlyga abanýan wehimlere garşy göreşmäge ygrarlydygyny aýtdy.
Dümýäde
6. Ispaniýanyň Çiwa şäherinde suw joşmasyndan soň işläp, hapalanan nasosdan suwuň içilmegi sebäpli ýerli ýaşaýjylaryň arasynda keseliň ýaýramagy hasaba alyndy. Walensiýa sebitindäki ýagdaý «Dana» diýlip atlandyrylan güýçli tupandan soň çylşyrymly bolmagynda galýar. Halas ediş işleri dowam edýär: meýletinçiler we ýörite gulluklar dereksiz ýitenleri gözleýärler hem-de galyndylary arassalaýar. Iň soňky maglumatlara görä, aradan çykanlaryň sany 217 adama ýetdi, ýene 89 adamyň ykbaly näbelli.
7. Gazagystanyň Almaty sebitiniň Gara kanýonynda täze özüne çekiji ýer – asma aýna köpri peýda bolar. Bu ýyl Kolsaý we Kaýyndy köllerine 400 müň töweregi syýahatçy geldi. Ýerli tebigatyň gözelligine haýran galanlaryň köpüsi ajaýyp Kortogaý jülgesine-de baryp gördüler. Şeýle ýokary gyzyklanma göz öňünde tutulyp, bu ýeri doly hukukly syýahatçylyk sebitine öwürmek kararyna gelindi. Ilki bilen, bu çägi elektrikleşdirmek üçin döwlet býujetinden 600 million tenge bölünip berildi. Mundan başga-da, infrastrukturany ösdürmäge öz serişdelerini goýmaga taýýar hususy maýadarlar taslama gyzyklanma bildirdiler. Uzynlygy 170 metr we beýikligi 80 metr bolan bu köpri sebitdäki iň uzyn we iň beýik aýna köprüleriň biri bolar.
Sport täzelikleri
8. «Altyn Asyr» türkmen klubynyň baş tälimçisi Ýazguly Hojageldiýew AFK-2 Çempionlar ligasynyň 4-nji tapgyrynda Saud Arabystanynyň «Al-Taawun» topary bilen duşuşygyň öňüsyrasynda metbugat maslahatyny geçirdi. Tälimçiniň bellemegine görä, bu ýaryş onuň geçen möwsümde uly täzelenmä eýe bolan ýaş topary üçin ajaýyp mekdep boldy. Topar diskwalifikasiýa sebäpli duşuşyga gatnaşyp bilmeýän iki oýunça – Ruslan Täjiýewe we Döwlet Mirsultanowa bil baglap bilmese-de, öňündäki oýna tutanýerli taýýarlyk görýär. Toparyň hüjümçisi Rahman Myratberdiýew toparyň duşuşyga doly taýýardygyny hem-de «ýurt we janköýerler üçin göreşmek» isleýändigini aýtdy. Duşuşyk şu gün «Aşgabat» stadionynda geçiriler, oýun 19:00-da başlar.
9. 4-nji noýabrda Aşgabatda geçirilen nobatdan daşary saýlaw konferensiýasynda Guwançmuhammet Öwekow biragyzdan Türkmenistanyň Futbol federasiýasynyň täze başlygy wezipesine saýlandy. Professional karýerasyny tamamlandan soň, Guwançmuhammet «Ahalyň» tälimçiler toparynda işledi, soňra «Ahal» we «Arkadag» futbol klublaryna ýolbaşçylyk etdi. Onuň ýolbaşçylygynda «Ahal» 2022-nji ýylda çempionatda we Türkmenistanyň kubogynda ýeňiji bolup, «altyn dubla» adyny ýazdyrdy, hünärmen indiki möwsümde şeýle üstünligi «Arkadag» bilen hem gazanmagy başardy. Iki toparyň hem çempionlyk gazanan möwsümlerini hiç hili ýeňlişsiz geçirendigini bellemek gerek.
