Türkmenistanyň Russiýa Federasiýasynyň Astrahan sebitindäk konsuly Gadam Ilamanow Ikinji Hazar ylym-bilim kongresine gatnaşdy. Bu barada Türkmenistanyň Astrahandaky konsullygynyň metbugat gullugy habar berýär.

Bellenilişi ýaly, Türkmenistanyň Astrahandaky konsuly Gadam Ilamanow Ikinji Hazar ylym-bilim kongresiniň plenar mejlisinde çykyş edip, bu platformanyň sebitiň mundan beýläk-de gülläp ösmegine goşant goşjak geljegi uly ugurlary durmuşa geçirmekde konstruktiw dialogyň guraly hökmünde möhüm ähmiýete eýedigini belläp geçdi.

Şeýle-de Astrahan sebitiniň gubernatory Igor Babuşin forumda eden çykyşynda bu kongresiň «Demirgazyk — Günorta» halkara ulag geçelgesini ösdürmekligiň çäginde Hazaryň kenarynda Türkmenistan bilen bilelikdäki logistika we infrastruktura taslamalarynyň durmuşa geçirilmegine goşant goşjakdygyna ynam bildirdi.

Forum Hazarýaka sebitiniň ýurtlaryndan, şeýle hem Belarus Respublikasyndan, Özbegistan Respublikasyndan we Serbiýadan alymlary, işewür wekilleri we hünärmenleri bir ýere jemledi. Forumyň dowamynda gatnaşyjylar ylym, bilim, ekologiýa, medeniýet we syýahatçylyk ugurlaryndaky hyzmatdaşlyk meselelerini ara alyp maslahatlaşdylar.

Ýeri gelende ýatlatsak, mundan ozal Türkmenistanyň Russiýa Federasiýasynyň Astrahan sebitindäki konsuly Gadam Ilamanowyň Ikinji Hazar ylym-bilim kongresiniň çäginde geçirilen «Maşgala häzirki zaman Russiýanyň we Hazarýaka ýurtlarynyň däp bolan gymmatlygy hökmünde» atly halkara konferensiýada türkmen halkynyň däbe öwrülen maşgala gymmatlyklary barada gürrüň berendigini hem-de Türkmenistanyň Inžener-tehniki we ulag kommunikasiýalary institutynyň wekiliýetiniň Ikinji Hazar ylym-bilim kongresiniň çäginde guralan «Suw ulaglarynyň meselelerini çözmegiň häzirki zaman çözgütleri» atly halkara ylmy-amaly maslahata gatnaşandygyny habar beripdik.