Girmek
ABŞ-da 110 milliondan gowrak adam howanyň ýaramazlaşmagy sebäpli howp astynda, ýagny olara harasatlardyr tupanlar howp salýar. Eýýäm ýurtda harasatlardan 21 adam heläk boldy diýip, CNN teleýaýlymyna salgylanýan «Ren.tv» ýazýar.
Ýaramaz howadan ýurduň merkezi sebitleriniň – Arkanzasyň, Kentukkiniň, Tehasyň we Oklahomanyň ýaşaýjylary ejir çekdiler. Dört çaga heläk boldy.
«Geçen ýekşenbede ýurduň azyndan 20 ştatynda bulaşyk howadan ejir çekýänlerden kömek sorap, 600 habar gelip gowuşdy. Sebitlerde güýçli şemal, harasat, pökgi ululygyndaky doly ýagdy. Harasatlar öýleri haraba öwürdi, awtoulaglary agdardy, eletrik geçirijiler üzüldi» diýlip, habarda bellenýär.
Habar beriş serişdeleri 450 müň amerikalynyň öýüniň yşyksyz galandygyny habar berýärler.
Kentukkiniň gubernatory Endi Beşir sebitde adatdan daşary ýagdaý yglan etdi.