Girmek
Häzirki wagtda Türkmenistan bilen Astrahan sebitiniň arasynda gönüden-göni gämi gatnawlaryny ýola goýmak hem-de Astrahanda Türkmenistanyň söwda öýüni açmak boýunça gepleşikler geçirilýär. Degişli meseleler 15-nji aprelde Türkmenistanyň Astrahan şäherindäki konsuly Gadam Ilamanow bilen Astrahan sebitiniň gubernatory Igor Babuşkiniň arasynda bolup geçen duşuşykda hem ara alnyp maslahatlaşyldy. Bu barada «Lotos» habar berýär.
Çeşmäniň habar bermegine görä, taraplar, hususan-da, Türkmenbaşynyň halkara deňiz porty bilen Astrahan sebitiniň Limanskiý etrabynyň Olýa portunyň arasynda yzygiderli parom gatnawyny ýola goýmak meselesi boýunça pikir alşyldy.
Mundan başga-da, türkmen konsuly G.Ilamanow we Astrahan sebitiniň ýolbaşçysy I.Babuşkin Astrahanda Türkmenistanyň oba hojalyk, dokma we senagat önümlerini satyn almaga gyzyklanýan taraplar üçin söwda öýüni açmagyň mümkinçiliklerini hem ara alyp maslahatlaşdylar.
Mundan ozal duşuşykda Astrahanda «Lotos» erkin ykdysady zolagynda Türkmenistanyň logistika merkezini döretmek boýunça gepleşikleriň geçirilendigini habar beripdik.