Şu ýyl Halkara ynsanperwer ylymlary we ösüş uniwersitetinde taýýarlygyň 2 ugry boýunça bilim alan 48 sany magistrantyň uçurym bolmagyna garaşylýar. Bu barada ýokary okuw mekdebi «Turkmenportala» habar berdi.
Şeýle-de şu ýyl 16 hünär boýunça bakalawr bilim maksatnamasy esasynda bilim alan 425 sany talybyň hem bu ýokary okuw mekdebini tamamlanmagyna garaşylýar. Talyplara halkara bilim standartlaryna laýyklykda iňlis dilinde sapaklar geçildi we HYY we ÖU olaryň gerekli hünärmenler bolup ýetişendigine ynam bildirýär.
Ýeri gelende bellesek, 17-nji aprelde bu ýokary okuw mekdebinde özüniň şu ýylky uçurymlaryna iş tapmaga we iş berijilere geljegi uly işgärleri tapmakda ýardam etjek iş orunlarynyň hödürleniş çäresi geçiriler. Çäre sagat 14:00-da başlanar. Oňa iş berijiler hökmünde ministrlikleriň, pudaklaýyn dolandyryş edaralarynyň, kärhanalaryň we hususy kompaniýalaryň wekilleriniň gatnaşmagyna garaşylýar.
