Şenbe güni Germaniýanyň Bundesligasynyň 28-nji tapgyrynyň birnäçe oýunlary geçirildi. Tapgyrda turnir tablisasynyň lideri «Baýer» myhmançylykda «Union» (Berlin) toparyny Wirziň 45+8-nji minutda 11 metrlik jerime urgusyndan uran goly bilen minimal hasapda ýeňlişe sezewar etdi.

Mýunheniň «Bawariýasy» bolsa garaşylmadyk ýagdaýda myhmançylykda «Haýdenhaýmdan» 3:2 hasabynda asgyn geldi. Tomas Tuheliň tälim berýän topary Keýniň (38) we Ganbriniň (45) gollary bilen 2:0 öňe geçen hem bolsa ýeňşi saklap galyp bilmedi. Oýnuň ikinji ýarymynda ýer eýeleri Hassanyň 50-nji minutdaky goly bilen aratapawudy gysgaldan bolsalar, soňra Klýandinstiň dubly (51, 79) arkaly ýeňşi öz taraplaryna agdyrdylar.
Tapgyryň ýene bir esasy oýnunda «Ştutgart» myhmançylykda Dortmundyň «Borussiýasyny» Girassiniň 64-nji minutda uran ýeke-täk goly bilen utmagy başardy.

Şeýlelikde, ýaryşyň tamamlanmagyna 6 oýun galanda «Baýer» 76 utuk bilen birinji orny eýeläp dur. Ikinji orundaky «Bawariýanyň» hem-de üçünji ýerdäki «Ştutgartyň» bolsa hersinde 60 utuk bar. Şundan görnüşi ýaly eger-de «Baýer» topary ýene bir ýeňiş gazansa, wagtyndan öň Bundesliganyň çempionyna öwrüler.

Bundesliganyň indiki tapgyrynda «Baýer» 14-nji aprel güni öz öýünde «Werder» bilen duşuşar, «Bawariýa» bolsa bir güň öň «Kýölni» kabul eder.

Şol gün «Ştutgart» hem öz öýünde «Aýntraht» bilen güýç synanyşar.