Şu gün irden Täjigistana iki günlük resmi sapar bilen baran türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow ilkinji täjik döwletini esaslandyryjy Şah Ismoil Somoniniň ýadygärliginiň etegine gül dessesini goýdy.

Ýokary derejeli myhmanyň ýanynda bu çärä Täjigistan Respublikasynyň Premýer-ministri Kohir Rasulzoda we beýleki resmi adamlar gatnaşdylar diýip, NIAT "Howar" habar berýär.
Türkmenistanyň Halk Maslahatynyň Başlygy Gurbanguly Berdimuhamedowyň saparynyň çäklerinde ýokary derejeli türkmen-täjik gepleşikleriniň geçirilmegi göz öňünde tutulýar. Türkmenistan we Täjigistan ikitaraplaýyn hyzmatdaşlygyň giň gerimine sereder.

Duşuşykdan we ýokary derejeli gepleşiklerden soňra, ikitaraplaýyn hyzmatdaşlyga degişli birnäçe täze resminamalara gol çekilmegine garaşylýar.

Resmi saparynyň maksatnamasynyň çäklerinde, türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň Täjigistan Respublikasynyň Oli Majlisiniň Milli Majlisiniň Başlygy Rustam Emomali, Täjigistan Respublikasynyň Oli Majlisiniň Namoýandagon Majlisiniň ýolbaşçysy Mahmadtoir Zokirzoda, Täjigistan Respublikasynyň Premýer-ministri Kohir Rasulzoda bilen hem duşuşyklary bolar.

Türkmen halkynyň Milli Lideri Türkmenistanyň we Täjigistanyň sungat ussatlarynyň bilelikdäki “Dostluk agşamy”
konsertine-de tomaşa eder.