Türkmenistanly agyr atletikaçylar şu gün Tailandyň Phuket şäherinde başlanan, dünýäniň 109 döwletinden 450 türgeni özünde jemlän dünýä çempionatyna gatnaşýarlar.
Dünýä çempionaty, şol bir wagtyň özünde, Olimpiýa oýunlary ― 2024-iň saýlama tapgyrydyr. Şu ýaryşyň netijeleri boýunça her agram derejesinde ilkinji 10-luga girip bilen agyr atletikaçylar Parižde geçiriljek Olimpiýa oýunlaryna gatnaşmaga ýollanma alarlar.
Türkmenistanyň milli ýygyndysy dünýä çempionatyna 9 türgen bilen gatnaşýar.
Ýurduň zenanlar ýygyndysyna Kristina Şermetowa (59 kilograma çenli) bilen Anamjan Rustamowa (81 kilograma çenli) wekilçilik edýär.
Türkmenistanyň erkekler ýygyndysynyň hatarynda bolsa Seýitjan Mirzaýew (61 kilograma çenli), Bunýad Raşidow, Bektimur Reýimow (ikisi hem 73 kilograma çenli), Maksat Meredow (81 kilograma çenli), Gaýgysyz Töräýew, Şatlyk Şöhradow (ikisi hem 89 kilograma çenli), Döwranbek Hasanbaýew, Şahzadbek Matýakubow (ikisi hem 102 kilograma çenli) we Hojamuhammet Toýçyýew (109 kilogramdan ýokary) dagylar bar.
Türkmenistanly agyr atletikaçylaryň çykyşlaryna 2-nji aprelde Seýitjan Mirzaýew badalga berer. Ondan bir gün soňra zenanlaryň arasynda 59 kilograma çenli agram derejesinde Kristina Şermetowa ýaryşar. 4-nji aprel güni Raşidow bilen Reýimow, 6-njy aprelde Meredow, Töräýew Şöhradow agyrlyk göterer.
Türkmen agyr atletikaçylarynyň çykyşlary 8-nji aprelde Hasanbaýewdir Matýakubowyň çykyşy bilen dowam eder. 9-njy aprelde Rustamowa medallar üçin göreşer. Ýaryşyň ahyrky gününde ― 11-nji aprelde bolsa Toýçyýew Olimpiýa ýollanmasyny almak üçin göreşe goşular.
