Girmek
Türkmenistanyň daşary işler ministri Raşid Meredow Halkara oba hojalygyny ösdürmek gaznasynyň prezidenti Alwaro Lario bilen duşuşdy. Bu barada Türkmenistanyň DIM-niň resmi saýtynda habar berildi.
2024-nji ýylyň 20-nji martynda bolan duşuşykda taraplar Türkmenistan bilen bu guramanyň arasyndaky gatnaşyklarynyň häzirki ýagdaýy we oba hojalygy pudagynda hyzmatdaşlygyň geljegi barada pikir alyşdylar.
Habarda bellenilişi ýaly, şol gün türkmen wekiliýetiniň Birleşen Milletler Guramasynyň Azyk we oba hojalygy guramasynyň (FAO) Baş direktorynyň orunbasary Maurisio Martina bilen duşuşygy geçirildi.
Taraplar bilelikdäki taslamalar we meýilleşdirilýän işler barada pikir alyşdylar. Duşuşykda Türkmenistanyň howanyň üýtgemegi bilen baglanyşykly azyk howpsuzlygy pudagyndaky hyzmatdaşlygy güýçlendirmek meýilleri beýan edildi.
Taraplar oba hojalygynda hyzmatdaşlygyň täze ugurlaryny öwrenmek barada ylalaşdylar.