10-njy martda Owganystandaky iň uly elektrik kompaniýasy bolan «Da Afghanistan Breshna Sherkat»-nyň (DABS) wekilleriniň we Türkmenistan Energetika ministrliginiň Türkmenistan — Owganystan — Pakistan halkara elektrik energiýasy taslamalary bölüminiň başlygy Myrat Artykowyň we Türkmenistanyň ilçihanasynyň wekilleriniň gatnaşmagynda duşuşyk geçirildi.
DABS-yň habaryna görä, duşuşyk «Nurul-Jihad» kiçi bekedini we elektrik geçiriji liniýalaryny ösdürmek taslamalaryna bagyşlandy. Duşuşykda zerur enjamlaryň geçirilmegi, galan taslama işleriniň tamamlanmagy ýaly işler maslahatlaşyldy we maglumat berildi diýlip, metbugat beýanatynda aýdylýar.
Hyratdaky «Nurul-Jihad» kiçi bekediniň döwrebaplaşdyrylmagy, Türkmenistandan elektrik energiýasynyň importynyň köpelmegi bilen bir hatarda Owganystanyň demirgazyk-günbatar zolagynda elektrik ýetmezçiligini ep-esli azaldar diýlip garaşylýar. Elektrik ýetmezçiligi meselesini çözmek içerki önümçiligiň, ykdysady ösüşiň, oba hojalygynyň ösmegine we sebitdäki işleriň işjeňligine oňyn täsir eder diýlip, «nCa» tarapyndan berlen habarda bellenilýär.
