ABŞ-nyň Senaty Prezidentiň Diwanyna degişli dürli wezipelere hödürlenen dalaşgärleri gözden geçirer. 11-nji ýanwarda geçirilen metbugat ýygnagynda agzalan dalaşgärleriň arasynda Amerikanyň Birleşen Ştatlarynyň Türkmenistandaky Adatdan daşary we Doly ygtyýarly ilçisi wezipesine hödürlenen Elizabet Rud hem bar.

2022-nji ýylyň awgust aýynda ABŞ-nyň döwlet Baştutany Jozef Baýden Prezidentiň Diwanyna ýolbaşçylyk etmek üçin birnäçe adamy dürli wezipelere bellemek pikirini mälim edende, Elizabet Rudi hem ABŞ-nyň Türkmenistandaky ilçisi wezipesine dalaşgär hökmünde görkezilipdi.

Ýeri gelende aýtsak, ABŞ-nyň daşary ýurtlardaky ilçileri Ak tamyň administrasiýasy tarapyndan bellenilýär we dalaşgärler ABŞ-nyň Senaty tarapyndan tassyklanylýar.

Elizabet Rud häzirki wagtda ABŞ-nyň Russiýadaky işleri wagtlaýyn ynanylan wekilidir. Ondan öň bolsa ol ABŞ-nyň Harby kollejinde fakultetiň geňeşçisi, ABŞ-nyň Gruziýanyň Tbilisi şäherindäki diplomatik wekilhanasynyň ýolbaşçysynyň orunbasary bolup işledi.

Mundan başga-da, ol ABŞ-nyň Kabuldaky ilçihanasynyň syýasy meseleler boýunça geňeşçisi, ABŞ-nyň Pakistanyň Peşawar şäherindäki Baş konsullygynyň baş hünärmeni, Döwlet departamentiniň Owganystanyň günorta-gündogar welaýatlaryndaky dikeldiş toparynyň wekili bolup hem işledi.

Elizabet Rud Merilden uniwersitetiniň uçurymy bolup, ol fransuz, gruzin, nemes, puşty we dari dillerinde gürleşip bilýär.