Aşgabadyň «Altyn asyr» futbol topary Türkmenistanyň çempionatynyň şu möwsüminde diňe bir özüniň kümüş medalyny kesgitlemän, eýsem, üçünji ornuň eýesini hem kesgitlän topar boldy. «Aragatnaşykçylar» şu gün 27-nji tapgyryň çäginde paýtagtyň Büzmeýin etrabyndaky Sport toplumynda geçirilen duşuşykda «Ahaly» 2:1 hasabynda ýeňip, «Nebitçiniň» bürünç medala mynasyp bolmagyna şert döretdiler.

10 oýunça sary kart görkezilen, bir oýunçynyň meýdandan çykarylan duşuşygynda «Altyn asyryň» gollaryny 53-nji we 59-njy minutlarda Rahman Myratberdiýew geçirdi. «Ahalyň» bir jogap goly bolsa 83-nji minutda Ýokary liga ― 2023-de ýüze çykan ýaş ýyldyzlaryň biri Gurbanmuhammet Esenowdan geldi.

Şeýlelikde, «Altyn asyr» şu möwsümdäki ähli resmi duşuşyklaryny tamamlady. 24 duşuşykda 54 utuk toplap, bassyr ikinji gezek kümüş medala mynasyp bolan Ýazguly Hojageldiýewiň şägirtleri geçiren duşuşyklarynyň 17-sinde ýeňiş gazandylar, 4 duşuşykda ýeňildiler, 3 duşuşygyny bolsa deňlikde geçirdiler. Bu duşuşyklarda garşydaş derwezelere 57 gol geçiren «Altyn asyr» öz derwezesinde 26 gol gördi.

Ätiýaçda ýene bir oýny galan «Ahal» bolsa 23 duşuşykda 35 utuk toplap, dördünji orny eýeledi. Geçen ýylky çempionyň bu möwsümdäki pes netijesinde birinji aýlawdaky gowşak oýnuň täsiri uludyr. Her niçik hem bolsa ikinji aýlawa ýaryş tertibiniň sekizinji basgançagyndan girişen «Ahal» möwsümi dördünji orunda tamamlap bildi.

«Altyn asyr» – «Ahal» – 2:1

Gollar: 53, 59 Rahman Myratberdiýew – 83 Gurbanmuhammet Esenow.