Türkmenistanyň Prezidenti Serdar Berdimuhamedow Türkmenistanyň halkynyň we Hökümetiniň adyndan, şeýle hem hut öz adyndan Kuweýt Döwletiniň Emiri Şeýh Mişal Al-Ahmad Al-Jaber Al-Sabaha Onuň Alyjenaby Kuweýt Döwletiniň Emiri Şeýh Nawaf Al-Ahmed Al-Jaber Al-Sabahyň aradan çykmagy zerarly gynanç hatyny iberdi. Bu barada «Watan» habarlar gepleşiginde habar berildi.

— Goý, Gudraty güýçli Allatagala şu agyr pursatda Size we maşgala agzalaryňyza ruhy durnuklylyk we sabyrlylyk bersin – diýip, Prezident Serdar Berdimuhamedow dileg etdi we merhumyň maşgala agzalaryna, ýakynlaryna, şeýle hem Kuweýt Döwletiniň ähli halkyna ýürekden duýgudaşlyk sözlerini beýan etdi.

Maglumat hökmünde ýatlatsak, «AP» habarlar gullugynyň habar bermegine görä, Kuweýt Döwletiniň Emiri Şeýh Nawaf Al-Ahmed Al-Jaber Al-Sabah 86 ýaşynda aradan çykdy. Nawaf Kuweýt döwletiniň 16-njy Emiridir. Ol 2020-nji ýylyň 29-njy sentýabrynda bu ýokary döwlet wezipesine bellenipdi. Kuweýtiň 16-njy Emiri 1937-nji ýylyň 25-nji iýunynda El-Kuweýt şäherinde dünýä indi. Ol ýurduň içeri işler ministri, goranmak ministri, Premýeriň orunbasary wezipelerinde zähmet çekdi. 2006-njy ýylda as-Sabah maşgalasynyň mirasdüşeri diýlip yglan edilipdir.

Emiriň aradan çykmagy sebäpli ýurtda 40 gün matam yglan edildi we resmi edaralar 3 gün ýapyk bolar.

Kuweýtiň mirasdüşer şazadasy hökmünde, ýurduň Konstitusiýasyna laýykylykda, 83 ýaşyndaky Şeýh Mişal Al-Ahmad Al-Jaber Al-Sabah ýurduň täze Emiri diýlip yglan edildi.