Girmek
Türkmenistanly türgen Döwletjan Ýagşymyradow Kaliforniýada geçirilen «Bellator 300» turniriniň çäginde polşaly Maseý Rozanskiniň üstünden gazanylan ýeňiş üçin, höweslendiriji tölegler bilen bilelikde jemi 100 müň amerikan dollaryny gazandy. Onuň garşydaşy bolsa 23 müň amerikan dollaryna eýe çykdy. Bu barada MMA Fighting sport neşiri habar berdi.
Ýeri gelende ýatlatsak, ýarym agyr agramda geçirilen tutluşyk doly üç raund dowam edip, eminleriň biragyzdan gelen netijesine görä — 30-27, 29-28, 29-28 hasabynda Döwletjan Ýagşymyradowyň peýdasyna tamamlandy.
Döwletjan Ýagşymyradow 2020-nji ýylyň dekabrynda «Bellator» promouşeni bilen şertnama baglaşdy. Ol bu guramada çykyş edýän ilkinji türkmenistanly hökmünde hem taryha girdi. Döwletjan şu wagta çenli garyşyk söweş sungaty boýunça geçirilen turnirlerde 21 ýeňiş gazanyp, 7 gezek ýeňlişe sezewar boldy. Onuň gatnaşmagyndaky 1 söweş bolsa deňlikde tamamlandy.