Türkmenistanly küştçi Soltan Myradow Kazan şäheriniň Küşt federasiýasynyň Kubogynyň bäşinji tapgyrynda ikinji orny eýeledi. Ol belli küştçi Serdar Annaberdiýewiň şägirdidir.

Sport ussady Soltan Myradow Aşgabat şäherindäki Ýöriteleşdirilen küşt we şaşka mekdebinden uçurym boldy.

Dürli ýaş derejelerinde Türkmenistanyň bäş gezek çempiony (iki gezek 8 ýaşa çenli, 10, 14 we 18 ýaşa çenli türgenleriň arasynda bir gezekden) bolan türgen 15 ýaşa çenli küştçileriň arasynda 2017-nji ýyldaky Aziýa çempionatynda rapid boýunça ýeňiji bolupdy. Şeýle hem ol 2015-nji ýylda Soçide geçen ýetginjekleriň arasyndaky Bütindünýä oýunlarynda birinji, 2019-njy ýylda erkekleriň arasyndaky Türkmenistanyň Ýokary ligasynda dördünji orny eýeledi.

Soltan Myradow häzirki wagtda Kazanyň A.N.Tupolýowa adyndaky milli derňew tehniki uniwersitetinde okaýar.