BMG-niň Baş Assambleýasynyň çäginde Ýaponiýanyň Daşary syýasat edarasynyň başlygy Ýoko Kamikawa bilen Gazagystanyň daşary işler ministri Murat Nurtleunyň arasynda duşuşyk geçirildi. Taraplar geljek ýyl «Merkezi Aziýa — Ýaponiýa» görnüşinde sammit geçirmek üçin hyzmatdaşlyk etmek barada ylalaşdylar diýip, Ýaponiýanyň Daşary işler ministrligi habar.

Taraplar geljek ýyl amatly wagtda «Merkezi Aziýa — Ýaponiýa» sammitini geçirmegiň ýerlikli boljakdygy barada ylalaşdylar we şu Dialogyň häzirki başlygy Gazagystanyň we Ýaponiýanyň formatyň beýleki ýurtlary bilen işleşmek üçin hyzmatdaşlyk etjekdigini tassykladylar diýlip, habarda aýdylýar.

Bellenilişi ýaly, Ýaponiýa soňky döwürde Merkezi Aziýa ýurtlary — Türkmenistan, Gazagystan, Gyrgyzystan, Täjigistan we Özbegistan bilen gatnaşyklary ösdürmäge uly üns berýär.

2022-nji ýylyň dekabr aýynda Tokioda Merkezi Aziýanyň we Ýaponiýanyň daşary işler ministrleriniň duşuşygy geçirildi. Şonda Ykdysady hyzmatdaşlyk boýunça bilelikdäki Türkmen-ýapon we Ýapon-türkmen komitetleriniň nobatdaky 14-nji mejlisinde Türkmenistanyň Hökümet edaralary bilen himiýa senagaty, gaz senagaty, ulag we suw pudagyndaky ýapon kompaniýalarynyň arasynda birnäçe resminama gol çekildi.

Çeşmäniň bellemegine görä, şu ýylyň iýun aýynda Ýaponiýanyň Premýer-ministri Fumio Kişida ýurduň daşary syýasat edarasyna Türkmenistan, Gazagystan, Özbegistan, Gyrgyzystan we Täjigistan döwletleriniň Baştutanlary bilen ýokary derejeli duşuşyklaryň formatyny açmagyň üstünde işlemegi tabşyrjakdygyny aýdypdy. Ýaponiýa bilen Merkezi Aziýa ýurtlarynyň arasynda nobatdaky ýokary derejeli duşuşyklary 2024-nji ýylda geçirip başlamak meýilleşdirilýär.