Türkmenistanyň Prezidentiniň Täjigistana sapary başlanýar, «Türkmenistan» awiakompaniýasy uçarbeletlik okuwyna çagyrýar, Raşid Meredow Merkezi Aziýa ýurtlarynyň Daşary işler ministrleriniň geňeşiniň mejlisine gatnaşdy we beýleki habarlar

Türkmenistanda

1. Şu gün Prezident Serdar Berdimuhamedow iki günlük iş saparyny amala aşyrmak üçin Täjigistan Respublikasyna barar. Saparyň çäklerinde döwlet Baştutany Merkezi Aziýa döwletleriniň Baştutanlarynyň bäşinji Konsultatiw duşuşygyna we Araly halas etmegiň halkara gaznasyny esaslandyryjy döwletleriň Baştutanlarynyň Geňeşiniň nobatdaky mejlisine gatnaşar.

2. «Türkmenistan» awiakompaniýasy» uçarbeletleriň başlangyç okuwyna çagyrýar. Okuwlar 3 aýyň dowamynda tölegli esasda alnyp barlar we nazary hem-de amaly sapaklary öz içine alar. Resminamalar 18-nji oktýabra çenli kabul edilýär. Uçarbeletlik okuwyna dalaşgärlerden edilýän talaplar we gerek bolan resminamalaryň sanawy bilen awiakompaniýanyň resmi saýtynda tanşyp bilersiňiz.

3. Türkmenistanyň daşary işler ministri Raşid Meredow Merkezi Aziýa ýurtlarynyň Daşary işler ministrlikleriniň ýolbaşçylarynyň geňeşiniň mejlisine gatnaşdy. Daşary syýasat edaralarynyň ýolbaşçylary Merkezi Aziýa döwletleriniň Baştutanlarynyň Duşanbe şäherinde geçiriljek duşuşygynyň anyk netijeleri gazanmakda möhüm ähmiýete eýe boljakdygyna ynam bildirdiler. Soňky ýyllarda Merkezi Aziýa sebitiniň ýurtlary durnukly durmuş-ykdysady we ekologiki ösüşi goldamaga, innowasion senagaty döretmäge we ulag infrastrukturasyny ösdürmäge gönükdirilen möhüm hem-de iri çäreleri durmuşa geçirýärler.

4. Türkmenistanyň Bilim ministrligi tarapyndan bilimiň anyk derejesini tamamlamadyk, jemleýji döwlet synagyna gatnaşmadyk ýa-da jemleýji döwlet synagynda kanagatlanarsyz netijeleri görkezenlere bilim edarasynda okandygy hakynda berilýän kepilnamalaryň nusgalary tassyklanyldy. Türkmenistanyň Adalat ministrliginiň resmi web-saýtynda ýerleşdirilen täze buýruga laýyklykda, umumybilim berýän edarasynda, hünär-tehniki okuw mekdebinde, orta hünär okuw mekdebinde we ýokary okuw mekdebinde okandygy hakynda kepilnamanyň nusgalary tassyklandy.

5. Döwletmämmet Azady adyndaky Türkmen milli dünýä dilleri institutynda ýapon dilini öwretmek boýunça ýörite synp otaglaryny ulanmaga bermek dabarasy boldy. Synp otaglary Ýaponiýanyň Hökümetiniň ýörite taslamasynyň çäklerinde döwrebaplaşdyryldy. Dabara Ýaponiýanyň ilçisi Ýamamoto Hiroýuki gatnaşdy.

Dünýäde

6. 14-15-nji sentýabr aralygynda Duşanbe şäherinde Täjigistanyň Garaşsyzlyk baýramyna bagyşlanan palaw festiwaly geçiriler. Şeýle hem festiwalda Täjigistanda ösdürilip ýetişdirilen miwelere we gök önümlere bagyşlanan milli tagamlaryň sergisi guralar. Bu çäre Firdöwsi adyndaky Medeniýet we dynç alyş seýilgähinde geçiriler. Festiwala ýurduň şäherlerinden we sebitlerinden oba hojalyk önümlerini hem-de halk senetçiligine degişli işlerini hödürlejek dehkanlar we daýhanlar çagyryldy.

7. Sankt-Peterburgdaky Döwlet diniň taryhy muzeýinde häzirki zaman eýran ussalarynyň eserleriniň sergisi açyldy. 100-e golaý eksponaty özünde jemleýän sergide suratlar, keramika önümleri we senetçiler tarapyndan çekilen keşdeler görkezildi. Eksponatlar Eýran Yslam Respublikasynyň ilçihanasyndaky medeni merkez tarapyndan berildi. Olar Eýrana degişli däpler esasynda taýýarlanylandyr. Serginiň myhmanlary eýran halkynyň müň ýyldan gowrak ýaşy bolan bezeg we amaly-haşam sungatynyň nusgalary bilen tanşyp bilerler.

8. Amerikaly speleolog we çuňluklarda adamlary halas etmek boýunça tälimçi Mark Diki iki hepdeden soň gowakdan halas edildi. Ol Türkiýäniň iň çuň gowaklarynyň birinde içege ganamasy sebäpli örän köp sagat kömege garaşdy. Halas ediş işine 180-den gowrak adam – sekiz ýurtdan meýletinçiler, şeýle hem Türkiýäniň Adatdan daşary ýagdaýlar we tebigy betbagtçylyklaryň öňüni almak boýunça edarasynyň wekilleri gatnaşdylar.

Sport habarlary

9. Gonkongyň «Kitçi» toparynyň metbugat gullugy 2023/24-nji möwsümi üçin toparyň suratyny paýlaşdy. Toparyň suratynda geçen möwsümiň ahyrynda Gonkongyň çempionatynda iň gowy oýunçy diýlip ykrar edilen Türkmenistanyň milli ýygyndysynyň ýarymgoragçysy Ruslan Mingazow hem bar. «Kitçiniň» AFK Çempionlar ligasyna taýýarlyk görýär. Gonkongyň häzirki çempiony «Gündogar» zolakda «F» toparçada Koreýa Respublikasynyň kubogynyň wise-çempiony we ýeňijisi «Çonbuk Hýonde Motors», Taýland Çempionlar kubogynyň ýeňijisi we kümüş medalynyň eýesi «Bangkok Ýunaýted» we Singapuryň wise-çempiony «Laýon Sity Seýlors» bilen garşydaş bolar. Aziýanyň esasy klub ýaryşynyň toparçalaýyn oýunlary 18-nji sentýabrdan 13-nji dekabr aralygynda geçiriler.

10. Aşgabatda Türkmenistanyň Futbol federasiýasynyň guramagynda futzal eminleri üçin FIFA-nyň okuw-maslahaty geçirilýär. Okuw-maslahaty 12 – 16-njy sentýabr aralygynda geçiriler we eminleriň hünär derejesini ýokarlandyrmaga, fiziki taýýarlygyny we duşuşyklarda eminligiň hiliniň gowulandyrylmagyna bagyşlanar. Mundan başga-da, eminler FIFA-nyň fiziki taýýarlyk boýunça bellenen kadalarynyň esasynda ýörite synaglary tabşyrarlar.

11. «Mançester Sitiniň» operasiýa geçiren baş tälimçisi Hosep Gwardiola topar bilen işine gaýdyp geldi. Ispaniýaly tälimçi 22-nji awgustda Barselonada meýilleşdirilen arka operasiýasyny geçirdi, şondan soň lukmançylyk merkezinde bejergi aldy. Gwardiola ýok wagtynda onuň wezipelerini kömekçisi Huan Lilýo ýerine ýetirdi. Gwardiolanyň ýolbaşçylygyndaky «Mançester Siti» geçen möwsüm Çempionlar ligasynda ýeňiji boldy, şeýle hem Angliýanyň kubogynyň çempiony we ýeňijisi boldy. Awgust aýynyň ahyrynda ol Ýewropanyň futbol assosiasiýalarynyň bileleşiginiň (UEFA) netijesine görä, 2022/23-ni futbol möwsüminiň tälimçisi hökmünde ykrar edildi.