«Türkmenpoçta» poçta aragatnaşyk kompaniýasy Türkmenistanyň raýatlaryna ýurduň poçta bölümleri arkaly pul geçirmek hyzmatlaryny hödürleýär.

Poçta bölüminiň üsti bilen pul geçirmek üçin pul iberiji pasportyny ýa-da şahsyýetini anyklaşdyrýan başga bir resminamasyny görkezmelidir.

Geçirim üçin ýygym

Pul serişdeleri geçirilende «Türkmenpoçta» geçirilýän puluň umumy möçberiniň 1-5%-i aralygynda ýygym tutýar:

- 1-den 1000 manada çenli — 5%;

- 1001-den 2000 manada çenli — 4%;

- 2001-den 3000 manada çenli — 3%;

- 3001-den 4000 manada çenli — 2%;

- 4001-den 5000 manada çenli — 1%.

Şeýle hem, poçta pul geçirimini resmi kagyzda resmileşdirmek hyzmaty üçin müşderiden 2 manat pul alynýar.

Bu hyzmat «Türkmenpoçtanyň» ähli bölümlerinde elýeterlidir.

Alyjy tarapyndan geçirilen pul alynmadyk ýagdaýynda hereketler

Eger-de, geçirilen puly almaly adamyň 30 senenama gününiň dowamynda özüne iberilen nagt puly almak üçin «Türkmenpoçta» bölümine gelmedik halatynda, pul serişdeleri iberilen poçta bölümine gaýtarylýar. Bu barada iberiji 5 günüň dowamynda habarly edilýär.

Eger iberijiniň hem poçta bölümine yzyna gaýtarylyp getirilen puly almaga gelmedik ýagdaýynda, poçta operatory talap edilmedik serişdeleri iberijä degişli habarnama bilen 3 (üç) ýyl möhlet bilen kompaniýanyň hasabyna geçirer.

Şeýle-de okaň:

• «Türkmenpoçta» çaparçylyk hyzmatynyň mümkinçiliklerini artdyrýar