Bilimler we talyp ýaşlar gününde Türkmenistanyň Döwlet energetika institutynyň ýanaşyk çäklerinde täze goşmaça okuw binasynyň, umumy ýaşaýyş jaýynyň, sport desgasynyň we aýlawly ýolda monumentiň düýbi tutuldy. Bu barada «Türkmenistan» gazetiniň elektron nusgasynda habar berilýär.
Bellenilişi ýaly, energetika pudagy boýunça ussat hünärmenleri taýýarlaýan ýokary okuw mekdebiniň ýanaşyk çäklerinde 2 müň orunlyk täze goşmaça okuw binasynyň, 800 orunlyk umumy ýaşaýyş jaýynyň, ýapyk görnüşli sport desgasynyň hem-de aýlawly ýolda monumentiň dabaraly ýagdaýda düýbüniň tutulmagy bu bilim ojagynyň professor-mugallymlarydyr talyplary üçin şatlykly waka boldy.
Ozal habar berşimiz ýaly, Türkmenistanyň Prezidentiniň degişli Kararyna laýyklykda, binalaryň we desgalaryň gurluşyk işlerini ýerine ýetirmek «Röwşen» hususy kärhanasyna ynanyldy. Resminama laýyklykda, olary 2025-nji ýylyň sentýabr aýynda ulanmaga doly taýýar edip tabşyrmak bellenildi.
