Türkmenistan
1. Aşgabatda Türkmenistan – Täjigistan – Özbegistan görnüşinde ýokary derejeli duşuşyk geçirildi, onuň çäklerinde Serdar Berdimuhamedow, Emomali Rohman we şawkat Mirziýoýew öz ýurtlarynyň arasynda dostlukly hem-de özara bähbitli gatnaşyklary ösdürmegiň meselelerini ara alyp maslahatlaşdylar. Syýasy, ykdysady, energetika, suw-ekologiýa we ulag hyzmatdaşlygynyň berkidilmegi üç ýurduň gyzyklanmalaryna laýyk gelýär hem-de Merkezi Aziýada parahatçylygyň we howpsuzlygyň üpjün edilmegine ýardam berýär. Sammitiň jemleri boýunça Täjigistan Respublikasynyň, Türkmenistanyň we Özbegistan Respublikasynyň Bilelikdäki Beýannamasy kabul edildi.
2. Anna güni türkmen halkynyň Milli Lideri, Türkmenistanyň Halk Maslahatynyň Başlygy paýtagtyň Halkara howa menzilinden gelýän ýoluň ugrunda ak mermerli paýtagtyň gözel künjekleriniň birinde ýerleşýän köpriniň ýanynda saklandy. Türkmen telewideniýesiniň «Watan» habarlar gepleşiginiň habar bermegine görä, halk häkimiýetiniň ýokary wekilçilikli edarasynyň Başlygy köpriniň we ulag ýollarynyň ýakalarynda ornaşdyrylýan germewleri synlap, olaryň döwrebaplaşdyrylmagyna ünsi çekdi.
3. Türkmenistanyň Russiýa Federasiýasyndaky ilçisi Batyr Nyýazlyýew Gazagystanyň Russiýadaky täze ilçisi Dauren Abaýew bilen duşuşyk geçirdi. Duşuşygyň dowamynda taraplar Türkmenistan bilen Gazagystanyň arasynda özara hyzmatdaşlygyň işjeň we yzygiderli ösýändigini bellediler. Öz ýurtlarynyň daşary syýsasatynyň esasy ileri tutulýan ugurlaryny bellemek bilen, diplomatlar BMG-niň we beýleki abraýly guramalaryň çäklerinde ikitaraplaýyn hyzmatdaşlygy ösdürmegiň wajypdygyny bellediler.
4. Türkmenistanyň Balkan welaýatynyň Gyzylarbat etrabyndaky «Balkangallaönümleri» önümçilik birleşigi 2023-nji ýylyň birinji ýarym ýyllygynda bugdaý ununy öndürmek meýilnamalaryny 143% ýerine ýetirdiler. Balkan welaýatynyň daýhanlary bugdaý hasylyny ýygnamak boýunça şertnamalaýyn borçnamalaryny Türkmenistanda ilkinji bolup ýerine ýetirdiler. Kärhana ýylda 50 müň tonna un öndürýär we günde 200 tonna dänäni gaýtadan işleýär.
Dünýäde
6. Amerikanyň Kanzas ştatynyň ýaşaýjysy fermer Li Uilson durmuş toýlarynyň 50 ýyllyk ýubileýi üçin aýaly Renä adaty bir gül çemenini däl-de, giň meýdanda ekilen gülleri sowgat berdi. Tutuş maý aýynyň dowamynda Li ogly bilen ekin meýdanyna günebakarlary ekipdir: her ýarym gektara, takmynan, 1,5 müň tohum çigidi gerek bolupdyr. Toýlarynyň ýubileýini 10-njy awgustda belleýändiklerine garamazdan, fermer eýýäm aýalyna sowgadyny gowşurdy, çünki olaryň gerek senede güllemegini üpjün etmek kyndyr. Özüne çekiji gözel künjege günebakarlar ekile ägirt uly meýdany surata düşürmek üçin eýýäm syýahatçylar gelip başladylar.
7. Londonyň Patyşalyk kollejiniň alymlary oýanmagyň wagtynyň az-kem üýtgemegi bedeniň biologik ritminiň bozulmagyna we ýürek agyry, semizlik hem-de insult keselleriniň döremek mümkinçiliginiň artmagyna sebäp bolup biljekdigini ýüze çykardylar. Alymlar 934 adamyň maglumatlaryny öwrendiler we düşekde goşmaça 90 minut geçirmegiň bedeniň immunitetinden başlap, iýmit siňdirişe çenli birnäçe wezipelere täsir edýän içki biologik sagadynyň işiniň bozulmagyna sebäp bolýandygyny ýüze çykardylar.
Sport habarlary
8. Türkmen agyr atletikaçylary Hindistanyň Deli şäherinde ýetginjekleriň (17 ýaşa çenli) we ýaşlaryň (20 ýaşa çenli) arasynda geçirilýän Aziýanyň çempionatynda 10 altyn, 9 kümüş we 6 bürünç medala mynasyp bolmagy başardylar. Türkmenistanyň ýygyndysynda iň köp netije gazanan türgen Amanjan Rustamowa boldy, ol ýetginjek gyzlaryň arasynda 81 kg-a çenli agram derejesinde 6 sany altyn medal gazanmagy başardy. Şahzadbek Mätýakubow (96 kg çenli) ýaşlaryň arasynda üç altyn medala eýe boldy. Ýene bir altyn medaly Gaýgysyz Töräýew (81 kg çenli) silterläp götermekde (178 kg), iki kümüş medaly bolsa birbada götermekde (147 kg) we iki şertiň netijeleri boýunça (325 kg) gazandy. Perhat Bagtyýarow (61 kg) ýetginjekleriň arasynda birbada götermekde (112 kg), silterläp götermekde (144 kg) we iki şertiň netijeleri boýunça (256 kg) üç kümüş medala eýe boldy. Gülälek Kakamyradowa gyzlaryň arasynda (64 kg çenli) birbada götermekde (79 kg) we iki şertiň netijeleri boýunça (175 kg) iki kümüş medala, silterläp götermekde (96 kg) bolsa bir bürünç medala mynasyp boldy. Resul Rejepow (89 kg çenli) birbada götermekde (148 kg) we iki şertiň netijeleri boýunça (318 kg) iki kümüş medal, birbada götermekde (170 kg) bir bürünç medal gazanyp, ýaşlaryň arasynda Aziýanyň çempionatynyň wise-çempiony boldy. Ogulşat Amanowa gyzlaryň arasynda (45 kg çenli) birbada götermekde (65 kg), silterläp götermekde (80 kg) we iki şertiň netijeleri boýunça (145 kg) üç bürünç medala mynasyp boldy
