Arkadag şäheriniň açylyşy mynasybetli geçirilen dabaralaryň çäginde birnäçe ikitaraplaýyn şertnama gol çekildi. Olaryň hatarynda Aşgabat şäheri bilen Baku şäheriniň (Azerbaýjan Respublikasy) arasynda doganlyk gatnaşyklaryny ýola goýmak barada özara düşünişmek hakynda Ähtnama hem bar. Bu barada Türkmenistanyň Daşary işler ministrliginiň metbugat gullugyna salgylanyp, «CentralAsia.news» habar berdi.
Bellenilişi ýaly, Baku şäheriniň dolandyryş düzümini ýolbaşçysy Eldar Azizow, onuň orunbasary Aýaz Imamaliýew dagy Arakadag şäheriniň açylyş dabarasyna gatnaşyp, çäräniň çäklerinde türkmen tarapy bilen iki ýurduň paýtagtlarynyň doganlaşan şäherler derejesindäki gatnaşyklary ýola goýmak boýunça ylalaşyk baglaşdylar.
Ozal habar berşimiz ýaly, şol dabaralaryň çäklerinde Arkadag şäheri bilen Kazan şäheriniň (Russiýa Federasiýasynyň Tatarystan Respublikasy) arasynda doganlyk gatnaşyklaryny ýola goýmak hakynda Ylalaşyga, Arkadag şäheri bilen Telawi şäheriniň (Gruziýa) arasynda doganlyk gatnaşyklaryny ýola goýmak hakyndaky Ylalaşyga hem gol çekildi. Gol çekilen şeýle resminamalar daşary ýurtly hyzmatdaşlar dostlukly gatnaşyklaryň we özara gyzyklanma bildirilýän ähli ugurlarda hyzmatdaşlygyň mundan beýläk-de giňelmegine ýardam eder.
