Şu gün — 28-nji maýda Türkmen halysynyň baýramy mynasybetli Aşgabat şäherindäki Türkmen halysynyň milli muzeýinde haly we haly önümleriniň sergisi geçirildi

Serginiň başynda Türkmenistanyň Mejlisiniň Başlygy Dünýägözel Gulmanowa çykyş edip, halyçy gelin-gyzlary hünär baýramlary bilen gutlady hem-de Türkmenistanyň Prezidenti Serdar Berdimuhamedowyň Türkmen halysynyň baýramy mynasybetli halyçy zenanlara, şeýle-de türkmen halkyna iberen baýramçylyk Gutlagyny okady.

Serginiň açylyş dabarasynda ýerine ýetirilen aýdym-sazly, folklor çykyşlarda gözbaşyny asyrlardan alyp gaýdýan türkmen halysynyň dünýä dolan şöhraty, şeýle-de häzirki wagtda türkmen halylaryny dünýä tanatmakda alnyp barylýan işler, şol sanda halyçylara goýulýan belent sarpa wasp edildi.

Serginiň çäklerinde Türkmen halysynyň milli muzeýinde ýerleşdirilen dürli görnüşdäki halylar, şeýle-de haly we haly önümlerini halk köpçüligine hödürleýän, bu ugurda iş alyp barýan telekeçiler Orazgül Eýeberdiýewanyň, Kümüş Täjibaýewanyň, Ogulbagt Çopanowanyň we beýleki tekeçileriň taýýarlan haly we haly önümleri görkezildi.

Türkmenistanyň bäş welaýatynyň her haýsyna mahsus bolan halylaryň sergisi hem dabaranyň şatlygyny artdyrdy. Onda gelin-gyzlar haly dokamagyň inçe syrlaryny, şol sanda haly dokamakda ulanlýan gurallar bilen myhmanlary tanyşdyrdylar.

Ýeri gelende belläp geçsek, bu günki sergä daşary ýurtlarda türkmen halylaryny öndürmek bilen meşgullanýan kärhanalar hem gatnaşdylar. Olaryň arasynda Eýrandan, Owganystandan, Özbegistandan gelen türkmenler öz ýurtlarynda öndürilýän halylary bilen sergä gatnaşan myhmanlary tanyşdyrdylar.

Dünýäniň birnäçe ýurdundan gelen myhmanlar Türkmen halysynyň baýramy mynasybetli geçirilen haly we haly önümleriniň sergisine aýlanyp, bu ýerdäki halylaryň gözelligine, nepisligine, şeýle-de dokalyş aýratynlygyna ýokary baha berdiler.

Türkmen halysynyň milli muzeýiniň howlusynda geçirilen baýramçylyk sergisi hem özboluşlylygy bilen tapawutlandy. Bu ýerde türkmen gelin-gyzlarynyň milli lybaslary, şol sanda türkmen halkynyň milli gymmatlyklary şöhlelendirilip dabara gatnaşan myhmanlara türkmen tagamlary hem hödür edildi.