Girmek
Türkmenistanyň Körler küşt federasiýasy Türkmenistanyň Bedenterbiýe we sport baradaky döwlet komitetiniň, Türkmenistanyň körler we kerler jemgyýetiniň, şeýle hem Aşgabadyň maýyplar sport klubynyň goldaw bermeginde görüş mümkinçilikleri çäkli maýyplaryň arasynda küşt boýunça Aşgabat şäheriniň açyk çempionatyny geçirdi. Ýaryşyň netijelerine görä, erkekleriň arasynda Türkmenistanyň sport ussady Aýdogdy Atabaýew birinji, Çary Bäşimow ikinji hem-de Oraz Bäşimow üçünji orna mynasyp boldy.
Zenanlaryň arasynda bolsa küşt boýunça Türkmenistanyň sport ussady derejesine dalaşgär Gurbangül Esenowa birinji orny eýeledi. Ikinji ýer Arazgül Ballyýewa, üçünji ýer bolsa Gözel Lollykowa nesip etdi.
Ýetginjekleriň arasyndaky bäsleşikde Arslan Meredow uly artykmaçlyk bilen ýeňiji boldy. Bu ugurda Nurberdi Aşyrow ikinji, Rahym Annameňliýew bolsa üçünji orny eýeledi.
Erkekleriň arasyndaky bäsleşikde Gadyrgeldi Muhammedow güýçli dörtlüge girmegi başardy. Şeýlelikde, erkekleriň arasyndaky ýaryşda ilkinji dört orny alan küştçüler Türkmenistanyň çempionatynda Aşgabat şäherine wekilçilik ederler.
Bu ýaryş şu ýyl Türkmenistanyň Körler küşt federasiýasy tarapyndan geçirilen ilkinji ýaryş boldy. Federasiýa ýakyn wagtda Türkmenistanyň çempionatyny geçirmegi meýilleşdirýär.