Girmek
Hindistanyň goldawy bilen Türkmenistan öz harytlaryny Günorta-Gündogar Aziýa ýurtlaryna ibermek üçin mümkinçilik alyp biler. Muny «India Ports Global Limited» hindi kompaniýasynyň dolandyryjy müdiri Sunil Mukundan mälim etdi.
Mukundan bu barada Hindistanyň Türkmenistandaky ilçisi doktor Widhu Pithambaran Nair bilen bilelikde «Golos SNG» onlaýn radiosyna beren ýörite interwýusynda aýtdy. Ol öz interwýusynda Türkmenistan bilen ulag-üstaşyr, söwda-ykdysady ugurlarda hyzmatdaşlygyň geljegi barada gürrüň berdi.
Mukundan, Aşgabatda geçirilen «Halkara ulag we üstaşyr geçelgeleri: özara arabaglanyşyk we ösüş —2023» forumynyň Çabahar porty we Türkmenistanyň ulag edaralary üçin hyzmatdaşlygy güýçlendirmegiň ýollaryny tapmaga örän oňyn itergi berendigini aýtdy. Ol hindi kärdeşleriniň türkmen önümleriniň köp görnüşini satyn almak, şeýle hem hindi önümlerini Türkmenistana ibermek bilen gyzyklanyp biljekdigine ynam bildirdi.
Şu nukdaýnazardan, Mukundan hindi tarapynyň Türkmenistan üçin aragatnaşyk hyzmatlaryny berip biljekdigini, türkmen ýük akymynyň Günorta-Gündogar Aziýanyň ýurtlaryna we Hindistanyň üsti bilen ondan hem aňryk ýetip biljekdigini nygtady.