Girmek
«Türkmennebit» döwlet konserniniň burawlaýjylary uglewodorod çig mallaryna baý ýataklarda täze guýulary gazyp, olary senagat taýdan işläp taýýarlamakda we önümçilige tabşyrmakda tutanýerli zähmet çekýärler. Şu ýylyň 20-nji aprelinde konserniň «Goturdepe» buraw işleri müdirliginde gazuw işleri tamamlanan täze — 392-nji guýudan çüwdürim esasynda bol nebit akymynyň alynmagy hem muny doly tassyklaýar.
«Türkmenistan» gazetinde berilýän habara görä, Demirgazyk Goturdepe meýdançasynda burawlanan täze guýuda gazylan dag jynslarynyň çuňlugy 4 müň 740 metre ýetende, aşaky gyzyl reňkli ýedinji gatlakdan «gara altynyň» bol çüwdürimi alyndy. Guýynyň her gije-gündizde berýän nebiti 57 tonnadan hem geçýär.
Bu guýy gazylýarka, taslama çuňlugyna ýetilýänçä, ýene-de birnäçe nebitli gatlaklaryň hem üstünden baryldy. Munuň özi ýokarky gatlaklardaky nebiti hem almak bilen, guýynyň ulanyş möhletiniň 15 — 20 ýyla çenli dowam etjekdigini aňladýar. Guýynyň çüwdürim esasynda önüm berýändigi ykdysady taýdan juda peýdalydyr.