«Da Afghanistan Breshna Sherkat» kompaniýasy Owganystana baran türkmen wekiliýeti bilen geçirilen gepleşikleriň netijesinde Türkmenistandan import edilýän elektrik energiýasynyň möçberini ep-esli artdyrmak barada ylalaşyk gazanylandygyny mälim etdi. Owgan tarapyndan gepleşiklere kompaniýanyň ýolbaşçysy Alhaj Muhammad Hanif Hamza gatnaşdy. Bu barada «Ariananews» habar berýär.
— Biz Türkmenistandan import edilýän elektrik energiýasynyň nyrhlaryny üýtgetmek we onuň möçberini ep-esli ýokarlandyrmak barada ylalaşyga geldik. Bu biziň ýurtlarymyzyň arasyndaky hoşniýetli hyzmatdaşlygyň alamaty – diýip, kompaniýanyň ýolbaşçysy Alhaj Muhammad Hanif Hamza belläp geçdi.
Mundan başga-da, duşuşygyň dowamynda Hyratdaky Nur-ul-Jehad podstansiýasyny elektrik bilen üpjün etmek we Surhan — Puli — Humri elektrik geçiriji liniýasyny gurmak boýunça Owganystandaky taslamalaryň durmuşa geçirilişiniň gidişi ara alnyp maslahatlaşyldy. Gepleşiklere Türkmenistanyň Owganystandaky Adatdan daşary we Doly ygtyýarly ilçisi Hoja Öwezow we Türkmenistan — Owganystan — Pakistan (TAP) ugry boýunça elektrik geçiriji şahasyny gurmagy meýilleşdirýän «Calik Holding» (Türkiýe) kompaniýasynyň wekilleri hem gatnaşdylar.
Ýeri gelende bellesek, häzirki wagtda Owganystan içerki zerurlyklara sarp edilýän elektrik energiýasynyň 80 göterimini Merkezi Aziýa döwletlerinden we Eýrandan import edýär. Şonuň dörtden biri bolsa Türkmenistanyň paýyna düşýär. Gazanylan ylalaşygyň netijesinde bu möçber geljekde has-da ýokarlanar.
