Ozal habar berşimiz ýaly, şu günler Özbegistanyň Daşkent şäherinde boks boýunça dünýä çempionaty dowam edýär. Bu gün dünýä çempionatynda üç sany türkmen boksçysy ringe çykar. Has takygy, ýeňil agramda çykyş edýän Döwlet Muhadow wengriýaly Szaka Istawan (Aşgabat wagty bilen sagat 18:00) bilen tutluşar. Ýeňil agramda çykyş edýän türkmenistanly türgen Şükür Öwezow bolsa ýaryşdaky ilkinji tutluşygyny hytaýly Žao Ýikuna (Aşgabat wagty bilen sagat 18:30) garşy geçirer. Birinji orta agramda Türkmenistana wekilçilik edýän Baýramdurdy Nurmuhammedow kongoly Stewe Mbiýa Kulenguluka (Aşgabat wagty bilen sagat 20:30) bilen güýç synanyşar.

Mundan ozal, Türkmenistanyň boks boýunça erkekler ýygyndysynyň türgeni Hursant Imankulyýewiň Daşkent şäherinde (Özbegistan) geçirilýän dünýä çempionatynda ilkinji tutluşygyny geçirip, birinji ýarymorta agram derejede Belarus Respublikasyna wekilçilik edýän Dmitriý Deşkewiçi ýeňlişe sezewar edendigini habar beripdik.

1-nji maýda badalga alan turnir 14-nji maýa çenli dowam eder. Turnirde 13 agram derejede tutluşyklar geçiriler. Ýaryşa 104 ýurtda 640 türgen gatnaşar. Şolaryň ýedisi häzirki dünýä çempionlarydyr.

Turniriň baýrak gaznasy 5,2 million amerikan dollaryna barabardyr. Ýaryşyň ýeňijileri 200 müň amerikan dollary, kümüş medalyň eýeleri 100 müň amerikan dollary, üçünji orny eýelänler bolsa 50 müň amerikan dollary bilen sylaglanylar.

Daşkentde geçirilýän boks boýunça dünýä çempionatynyň tutluşyklaryna Türkmenistanyň çäginde «Матч Тв» we «Матч! Боец» rus teleýaýlymlary arkaly tomaşa etmek mümkin.

*Tutluşyklaryň wagty, takmynan, görkezilendir. Söweşden öň geçirilýän tutluşyklaryň wagtyndan öň tamamlanmagy netijesinde, onuň wagty öňe süýşüp biler.