Girmek
Daşkentde (Özbegistan) geçirilýän boks boýunça dünýä çempionatynda bu gün iki türkmen boksçysy ringe çykar. Has takygy, öýlän birinji agyr agramda Türkmenistana wekilçilik edýän Taganmyrat Gurbanow ýaryşdaky ilkinji tutluşygynda mozambikli boksçy Gabriel Albino Julio bilen duşuşar. Şu gün agşam bolsa birinji ýarymorta agramda ýaryşa gatnaşýan Hursant Imankulyýew Bolgariýa wekilçilik edýän Dmitri Diaşkewiç bilen tutluşar.
Ozal habar berşimiz ýaly, ýaryşda Türkmenistana 10 sany erkek türgen wekilçilik edýär.
1-nji maýda badalga alan turnir14-nji maýa çenli dowam eder. Turnirde 13 agram derejede tutluşyklar geçiriler. Ýaryşa 104 ýurtda 640 türgen gatnaşar. Şolaryň ýedisi häzirki dünýä çempionlarydyr.
Turniriň baýrak gaznasy 5,2 million amerikan dollaryna barabardyr. Ýaryşyň ýeňijileri 200 müň amerikan dollary, kümüş medalyň eýeleri 100 müň amerikan dollary, üçünji orny eýelänler bolsa 50 müň amerikan dollary bilen sylaglanylar.
Daşkentde geçirilýän boks boýunça dünýä çempionatynyň tutluşyklaryna Türkmenistanyň çäginde «Матч тв» we «Матч! Боец» rus teleýaýlymlary arkaly tomaşa etmek mümkin.