Geçen möwsümiň çempiony «Ahalyň» bassyr ikinji gezek utulyşy, «Arkadag» futbol toparyna degişli möwsümiň iň uly hasaply ýeňşi, «Energetigiň» Türkmenbaşy şäherinde ýerli «Şagadamdan» garaşylmadyk ýagdaýda üstün çykyşy, «Nebitçiniň» ýaryş tertibiniň başyna geçişi bilen Türkmenistanyň futbol çempionatynyň 3-nji tapgyry hem yzda galdy.
Eýsem, 3-nji tapgyr başga nähili aýratynlyklara eýe. Muny käbir gyzykly maglumatlarda jemledik:
― 3-nji tapgyrdan soň ýaryş tertibiniň kerwenbaşysy çalyşdy. «Köpetdag» iki tapgyrlap eýelän tagtyndan düşdi, onuň ornuna 7 utukly «Nebitçi» ýaryş tertibiniň başyna geçdi. Hersi 6 utuk toplan toparlardan «Arkadag» futbol topary ikinji, «Köpetdag» bolsa üçünji orny eýeleýär. Dördünji orundaky «Altyn asyrda» 4, 5 ― 8-nji orunlary paýlaşýan «Aşgabatda», «Energetikde», «Merwde» we «Ahalda» 3 utukdan bar. «Şagadam» bolsa heniz utuk gazanyp bilenok.
― Mary welaýatyna wekilçilik edýän iki topar ― «Merw» we «Energetik» täze möwsümdäki ilkinji ýeňşini gazandylar.
― Üç tapgyrdan soň diňe «Şagadam» futbol topary ýeňiş gazanyp görmedi, galan toparlaryň ählisi azyndan bir ýeňiş gazandylar.
― Möwsümde henize çenli utulmadyk üç topar galdy. Olar «Nebitçi», «Arkadag» we «Altyn asyr» futbol toparlarydyr.
― 3-nji tapgyrdan soň möwsümiň iň netijeli futbolçylarynyň sanawynda dört oýunçy her haýsy iki gol geçirip, beýlekilerden öňe saýlandy. Olar «Nebitçiden» Akmämmet Metdäýew bilen Daýanç Orazgulyýew, «Arkadag» futbol toparyndan Didar Durdyýew hem-de «Merwden» Alibek Abdyrahmanowdyr.
― 3-nji tapgyrdan soň möwsümde tapawutlanan futbolçylaryň sany 23-e çykdy. Biziň sanawymyzda «Arkadag» futbol toparynyň wekili Orazberdi Myradow möwsümde tapawutlanan 20-nji futbolçy hökmünde görkezilýär.
― «Ahalyň» ýarym goragçysy Amir Gurbany Ýokary ligada 2012-nji ýyldan bäri geçiren gollarynyň sanyny 50-ä tegeledi. Ol şol möwsümden bäri çempionatda 50 gol geçiren 22-nji futbolçy boldy.
― 3-nji tapgyrda derwezelere 12 pökgi geçirdi. Munuň özi Ýokary liga ― 2023-iň yzda galan tapgyrlarynyň arasynda iň ýokary netijedir. Möwsümde geçirilen gollaryň umumy sany bolsa 27-ä çykdy.
― «Nebitçi» üç tapgyrdan bäri utulman, «Şagadam» bolsa 3 tapgyrdan bäri utulyp gelýär.
― Akmämmet Metdäýew «Nebitçi» futbol topary bilen Ýokary ligada 2013-nji ýyldan bäri iň kän pökgi geçiren futbolçylaryň sanawynda ilkinji bäşlige girdi. Ol çempionatda topardaky 19-njy goluny geçirdi.
― Daýanç Orazgulyýew «Nebitçiniň» düzüminde Türkmenistanyň çempionatyndaky gollarynyň sanyny 10-a tegeledi.
