Şu gün — Aşgabat atçylyk-sport toplumynda ýazky at çapyşyk möwsümine badalga berildi. Möwsümiň badalga almagy mynasybetli Aşgabat atçylyk-sport topulymynyň öňündäki giň meýdança milli öwüşginlere baý boldy. Bu ýerde Türkmenistanyň sungat ussatlarynyň ýerine ýetirmeginde aýdymdyr sazlar ýaňlandy. Bu ýerde Aşgabat şäherinde hereket edýän sport mekdepleriniň türgenleriniň sportuň birnäçe görnüşi boýunça görkezme çykyşlary ýaýbaňlandyryldy. Suratkeşleriň, halyçylaryň, zergärleriniň taýýarlan el işleriniň hem sergisi at çapyşyk möwsüminiň açylmagy mynasybetli geçirilýän dabara gatnaşyjylara şatlyk paýlady.
Türkmenistanda badalga alan ýazky at çapyşyk möwsüminiň ilkinji güni ýetginjek çapyksuwarlaryň gatnaşmaklary bilen badalga aldy. Bu gün at çapyşyklarynyň jemi ýedisi geçirildi. Olaryň ählisi hem 1000 metr aralykdan bolup, oňa üçýaşar atlar gatnaşdy. Şeýle hem her çapyşyga atlaryň 7-si goşuldy.
Ýetginjekleriň arasynda geçirilen birinji çapyşykda 4-lik belgide ýaryşa goşulan Inçe atly dor gysrak pellehana ilkinji bolup gelmegi başardy. Ýazgeldi hem-de Ilkinji diýen atlaryň neslinden bolan Inçe Türkmenistanyň Prezidentiniň ahalteke atçylyk toplumyna degişli. Onuň seýsi Türkmenistanyň at gazanan atşynasy Toýlymyrat Babaýew, çapyksuwary bolsa B.Taýçaýew. Inçe bellenilen aralygy 1 minut 10,3 sekuntda geçmegi başardy.
Aşgabat şäher häkimligine degişli bolan Oglan atly gara at ikinji çapyşykda ýeňiji bolmagy başardy. Ýaryşa 4-lik belgide goşulan Oglan Gadymgala hem-de Ýyldyrym diýen atlaryň neslinden. Onuň seýsi ussat seýis Atajan Amansähedow, çapyksuwary bolsa O.Saparow. Oglan bellenilen aralygy 1 minut 7,4 sekuntda geçmegi başardy.
3-nji çapyşyk hem tolgundyryjy pursatlara baý boldy. Bu çapyşykda hem 4-lik belgide ýaryşa goşulan Gowluk atly dor at beýleki atlardan saýlanyp, pellehana ilkinji bolup gelmegi başardy. Gudrat hem-de Ýaýla diýen atlaryň neslinden bolan Gowluk Halkara ahalteke atçylyk-sport toplumyna degişli. Onuň seýsi Türkmenistanyň halk atşynasy Derýamyrat Saparow, çapyksuwary bolsa R.Rüstemow. Gowluk 1000 metr aralygy 1 minut 9,9 sekuntda geçmegi başardy.
3-lik belgide dördünji çapyşyga goşulan Gözel atly gara gysrak pellehana ilkinji bolup gelmegi başardy. Janköýerleriniň ynamyny ödemegi başaran Gözel Gözbaş hem-de Gülbahar diýen atlaryň neslinden bolup, ol S.A.Nyýazow adyndaky Türkmen oba hojalyk uniwersitetine degişli. Onuň seýsi Berdi Ataýew, çapyksuwary bolsa B.Taýçaýew. Gözeliň görkezen wagty 1 minut 8,1 sekunda deň boldy.
5-nji çapyşyk hem turuwbaşdan janköýerlerde uly şowhun döretdi. Biri-birinden ýyndam bedewleriň arasynda geçirilen bäsleşik toýçy mähelläniň şatlygyny artdyrdy. Bu çapyşykda 2-lik belgide ýaryşa goşulan Rowagül diýen dor gysrak pellehana ilkinji gelmegi başardy. Parasatly hem-de Rowaç diýen atlaryň neslinden bolan Rowagül Türkmenistanyň Prezidentiniň ahalteke atçylyk toplumyna degişli. Onuň seýsi Çary Ballyýew, çapyksuwary bolsa B.Taýçaýew. Rowagüliň görkezen wagty 1 minut 10,9 sekunda deň boldy.
6-njy çapyşykda 5-lik belgide ýaryşa goşulan Gojadaga taý tapylmady. Gözegçi hem-de Saýlanar diýen atlaryň neslinden bolan Gojadag Halkara ahalteke atçylyk-sport toplumyna degişli. Onuň seýsi Türkmenistanyň ussat halypa çapyksuwary A.Röwşenow, çapyksuwary bolsa Y.Täçliýew. Gojadagyň görkezen wagty 1 minut 7,7 sekunda deň boldy.
Ýedinji çapyşyk beýleki çapyşyklardan has-da täsirli boldy. Bu çapyşykda esasy ýaryş Belent diýen dor atyň, Gülparça diýen gurt mele gysragyň, şeýle-de Aýmonjuk atly gara gysragyň arasynda geçirildi. 7-nji çapyşyga gatnaşýan atlar pellehana tarap dogry ýola düşenlerinden soň, esasy bäsleşik Belent bilen Gülparçanyň arasynda boldy. Çapyksuwaryň görkezmelerine eýerip, arzyly pellehana ilkinji bolup Belent gelmegi başardy. Türkmenistanyň Prezidentiniň ahalteke atçylyk toplumyna degişli bolan Belent Bereket hem-de Gülýaprak diýen atlaryň neslinden. Onuň seýsi ussat seýis Bekmyrat Babaýew, çapyksuwary bolsa A.Ataýew. Belent bellenilen aralygy 1 minut 7,9 sekuntda geçmegi başardy. Halkara ahalteke atçylyk-sport toplumyna degişli bolan Gülparça hem pellehana ikinji bolup gelmegi bardy. Onuň görkezen wagt 1 minut 8,4 sekunda deň.
Ýaryşlarda ýeňiş gazanan bedewlere hormatly ýaşulular asylly awzuwlar, ýagşy dilegler bilen sylag-serpaý ýapdylar.
