Ýarym goragçy Myrat Annaýew «Altyn asyryň» düzüminde Ýokary ligada geçiren gollarynyň sanyny 30-a tegeledi. Şeýlelikde, ol «aragatnaşykçylar» bilen milli çempionatda 2013-nji ýyldan bäri iň kän pökgi geçiren futbolçylaryň sanawynda altynjy orna göterildi.

Bu sanawyň başyny 108 golly Altymyrat Annadurdyýew çekýär. Ol toparda soňky 11 möwsümde 100-den kän gol geçiren ýeke-täk futbolçydyr. Häzir karýerasyny Täjigistanda dowam etdirýän hüjümçi Süleýman Muhadow bolsa «Altyn asyrda» futbol oýnan ýyllarynda Ýokary ligada 63 gezek tapawutlandy. Ilkinji üçlügi 62 gol bilen Myrat Ýagşyýew jemleýär.

41 golly Didar Durdyýew bilen 36 golly Mihail Titow bu sanawyň ilkinji bäşliginde.

Myrat Annaýewiň 2-nji tapgyrda «Ahal» bilen geçirilen duşuşygyň 73-nji minudynda tapawutlanandygyny ýatladýarys.