Türkiýe Respublikasynyň Ankara şäherinde TÜRKSOÝ-yň Ýazyjylar birleşiginiň guramaçylyk ýygnagy geçirildi. 6-njy martda geçirilen ýygnaga Türkmenistanyň Türkiýedäki ilçihanasynyň ikinji sekretary Handurdy Turaýew hem gatnaşdy diýip, «Report» habar berdi.
Bu çärä Azerbaýjanyň Ýazyjylar birleşiginiň halkara gatnaşyklar boýunça sekretary Salim Babullaoglu, Gazagystanyň Ýazyjylar birleşiginiň ýolbaşçysy Ulugbek Esdaulet, Gyrgyzystanyň Ýazyjylar birleşiginiň başlygy Nurlanbek Kalibekow, Özbegistanyň Ýazyjylar birleşiginiň başlygy Sirojiddin Saýýid, Türkiýäniň Ýazyjylar birleşiginiň Direktorlar geňeşiniň agzasy Mahmut Erdemir hem-de Ýewraziýa Ýazyjylar birleşiginiň başlygy Ýakup Ömeroglu gatnaşdy.
TÜRKSOÝ-yň Baş sekretary Soltan Raýewiň bellemegine görä, Ýazyjylar birleşiginiň maksady türki dünýäsinde edebi gatnaşyklary berkitmekden ybaratdyr.
Duşuşygyň dowamynda Türki medeniýetiň halkara guramasynyň (TÜRKSOÝ) Ýazyjylar birleşiginiň başlygyny saýlamak bilen bagly guramaçylyk meselelerine hem seredildi. Netijede, Gazagystan Respublikasynyň Ýazyjylar birleşiginiň başlygy Ulugbek Esdaulet, şol bir wagtda TÜRKSOÝ-yň Ýazyjylar birleşiginiň hem başlygy wezipesine saýlanyldy.
