Şu gün, 1-nji martda Gurbannazar Ezizowyň doglan gününe bagyşlap Türkmenistanyň Oguz han adyndaky Inžener-tehnologiýalar uniwersitetiniň Tehniki ugurlar boýunça daşary ýurt dilleri kafedrasynyň we Jemgyýeti öwreniş ylymlary kafedrasynyň mugallymlarynyň we talyplarynyň gatnaşmagynda «Şahyr üçin bu dünýeden gitme ýok» ady bilen edebiýat agşamy geçirildi. Bu barada ýokary okuw mekdebiniň mugallymlary «Turkmenportal» web-saýtymyza habar berdiler.

Geçirilen bu çärede şahyryň ömri we döredijiligi, maşgalasy, terbiýeçilik äheňli aýratyn goşgulary, onuň goşgularynda güýz paslynyň waspy we Berkarar döwletiň täze eýýamynyň Galkynyşy döwründe Gurbannazar Ezizowyň waspy barada uniwersitetiň mugallymlaryň we talyplaryň ýerine ýetiren gyzykly çykyşlary dabara özboluşlylyk goşdy.

Uniwersitetiň talyplarynyň ýerine ýetirmeginde şahyryň käbir goşgularynyň çeper okaýşy bilen bir hatarda olar hem sahnalaşdyryldy hem-de üstünlikli ýerine ýetirildi. Şahyryň aýdyma öwrülen goşgy setirleri talyp ýaşlar tarapyndan uly höwes bilen ýerine ýetirildi. Şahyryň döredijiligi bilen içgin gyzyklanýan talyplar üçin uniwersitetde geçirilen bu edebiýat agşamy diýseň täsirli boldy.

Umuman, 1-nji mart — Gurbannazar Ezizowyň döredijiligine bagyşlap, uniwersitetiň çäginde ilkinji sapaklar başlamazdan öň ähli radiouzellerde şahyryň ömri we döredijiligi barada iňlis dilinde gysgaça gürrüň berildi we «Maňa seniň gözleriňden gitme ýok» atly goşgusy türkmen we iňlis dillerinde labyzly okaldy. Soňra her arakesmede ýaş şahyryň terbiýeçilik äheňli bir goşgusy bilen aýdyma öwrülen «Türkmen sährasy» goşgusy ýerine ýetirildi.