«Mançester Ýunaýted» Angliýanyň Liga kubogynyň finalynda «Nýukasly» ýeňlişe sezewar edip, kuboga eýe çykdy.
Duşuşyk 2:0 hasabynda «Mançester Ýunaýtediň» peýdasyna tamamlandy. «Ýunaýtede» ýeňiş getiren gollaryň birini Kazemiro (33') geçirdi, beýlekisi bolsa Reşfordyň (39') adyna ýazyldy.
Şeýlelikde, «Mançester Ýunaýted» 6 ýyllyk arakesmeden soňra, ilkinji titulyny gazandy. Topar soňky gezek 2017-nji ýylda Ýewropa ligasynyň çempiony bolupdy. «Ýunaýtediň» baş tälimçisi Erik Ten Hag bolsa klubyň taryhynda iň tiz wagtda kubok gazanan tälimçi boldy. Ol 276 günde topardaky ilkinji trofeýini gazanyp, bu ugurda ozalky rekordçy Mourinýony (281 gün) yzda galdyrdy.
Mundan başga-da, finalda «Mançester Ýunaýtediň» derwezesini ynamly goran Dawid De Hea bu toparyň düzüminde gol geçirtmedik oýunlarynyň sanyny 181-e ýetirdi. Şunlukda, ispaniýaly derwezeçi «Ýunaýtediň» lybasynda geçirilen «arassa» oýunlar boýunça Peter Şumaýheliň rekordyny (180 oýun) täzeledi.
