Türkmenistanyň Russiýa Federasiýasyndaky (Kazan şäheri) Baş konsuly Güýç Garaýewiň Naberezhnye Çelny döwlet pedagogika uniwersitetiniň (Naberezhnye Chelny State Pedagogical University (NCSPU)) rektory Alfinur Galiakberowa bilen iş duşuşygy geçirildi. Bu barada «Челнинские известия» gazeti habar berýär.
Taraplar özara gatnaşyklar üçin täze ädimleri we hyzmatdaşlygyň täze geljegi bolan ugurlaryny ara alyp maslahatlaşdylar.
2009-njy ýyldan bäri NCSPU bilen Türkmenistanyň arasynda ýakyn hyzmatdaşlyk ýola goýuldy. Häzirki wagtda uniwersitetde türkmen talyplarynyň 350-si bilim alýar. Habarda bellenilişine görä, türkmen talyplary köplenç matematika we informatika fakultetini, bedenterbiýe we sport fakultetini, şeýle hem filologiýa fakultetini saýlaýarlar. Şeýle hem uniwersiteti gutaran türkmen talyplarynyň müňden gowragy häzirki wagtda Türkmenistanda üstünlikli zähmet çekýärler diýlip bellenilýär.
Naberezhnye Çelny döwlet pedagogiki uniwersiteti Wolga-Kama sebitiniň bilim edaralary üçin mugallymlary taýýarlaýan Tatarstan Respublikasynyň (RF) Naberezhnye Çelny şäherindäki ýokary bilim edarasydyr. Naberezhnye Çelny şäherindäki pedagogika uniwersiteti 1990-njy ýylyň 1-nji sentýabrynda döredildi.
