Biraz ozal tamamlanan «Fulhem» — «Mançester Ýunaýted» oýny bilen Angliýanyň premýer-ligasynyň 16-njy tapgyryndan orun alan ähli duşuşyklar geçirilip gutardy. Tapgyryň soňky oýny myhman «Mançester Ýunaýtediň» 2:1 hasabyndaky ýeňşi bilen tamamlandy. «Ýunaýtediň» gollaryny 14-nji minutda Kristian Eriksen, 90+3-nji minutda Aleksand Garnaço derwezä ýollady. Ýer eýeleriniň ýeke-täk jogap topy 61-nji minutda Deniýel Jeýmsiň adyna ýazyldy. Tapgyryň iň esasy sensasiýasy «Mançester Siti» — «Brentford» gapma-garşylygynda hasaba alyndy. Oýunda myhman topar «Brentford» Touniniň dubly bilen (16, 90+8) garşydaşyndan 2:1 hasabynda rüstem geldi. «Sitiniň» goluna birinji ýaryma emin tarapyndan goşulan minutda Foden awtorlyk etdi. Tapgyryň ýene bir gyzykly wakasy «Nýukasl» — «Çelsi» duşuşygy boldy. Bu gapma-garşylykda ýer eýesi «Nýukasl» Jo Uillokyň 67-nji minutdaky dürs urgusy bilen minimal hasapda ýeňip, garşydaşynyň ligadaky bassyr üçünji ýeňlişine sebäp boldy. Mundan başga-da, tapgyrdan «Tottenhem» öz öýünde «Lidsi» 4:3, «Liwerpul» öz öýünde «Sauntgemptony» 3:1 hasabynda ýeňlişe sezewar etdi. Turnir tablisasynyň lideri «Arsenal» bolsa myhmançylykda 2:0 hasabynda «Wulwerhemptondan» üstün çykdy. 16-njy tapgyrdan soňra turnir tablisasynda 14 oýunda gazanylan 37 utuk bilen «Arsenal» birinji orny özünde saklaýar. Ikinji ýerdäki «Mançester Sitide» şonça oýundan soňra 32 utuk bar. Şeýle-de ýaryş jedweliniň ilkinji bäşliginde «Nýukasl» (15 oýun 30 utuk), «Tottenhem» (15 oýun 29 utuk) hem-de «Mançester Ýunaýted» toparlarynyň ady bar.

Şunuň bilen Angliýanyň premýer-ligasy Katardaky futbol boýunça dünýä çempionaty sebäpli bir aýlyk arakesmä çykdy. Liganyň indiki tapgyry 26-njy dekabrda badalga alar.